Nikumah aiin kuminah September-ah ruah tam

Ruah tui tamna Mizoramah ruah tui a tam tluang a, kuminah pawh a tam. September-ah pawh a tam a, nikum September-ah aiin kumin September-ah ruah a tam.
State Meteorological Centre-in an chhinchhiah danin, nikum September-ah ruah tui mm 231.6 a tla a, kumin September-ah mm 235 a tla. Kumin September-a tla a tam hret.
September-a ruah tui tla zat hi kum dangah pawh a tlem ngai lo tiin a sawi theih a, 2023-ah phei chuan September-ah mm 321.7 a tla.
September thla, favang thlaah kuminah ruah hi a sur ngun a, a sur loh ni kha ni riat chauh a awm. Ni tin deuh thaw a sur tiin a sawi theih. Amaherawhchu, vawi khatah tam tlawrh tlawrhin a sur lo.
October-ah pawh ruah hi a la sur a, ni 1-ah a sur nghal. Ni 8-ah phei kha chuan mm 31.8 a tling a, October atan chuan mm 31.8 hi a tlem lo.
September-ah hian kum dangah pawh ruah a sur tluang thin a, mahse tam tlawrh tlawrha a sur thla chu a ni lo. 2014-ah khan mm 414.1 a tla a, hetiang zat te hi chu September atan chuan a tam khawp mai.
September-ah hian mm 200 vel chu a sur ziah tiin a sawi theih a, beisei zat pawh chutiang vel chu a ni ang. August vel thlengin ruah a tam a, September-ah chuan a hma thla aiin a tlem thin.
Kuminah ruah a sur tluang a, September thla thleng khan ruah tui mm 2126 a tla tawh. Nikum khan September thlengin mm 2173.3 a tla a, 2023 khan September thla thlengin mm 1700.4 a tla. 2022-ah pawh September thla thlengin mm 1783.7 a tla. Thla kaw chhunga tlaah chuan mm 1700 leh a chung lam hi tam tham tak a ni.