Nikumah khualzin nuai 5 chuang Anthurium Festival nei leh dawn
Kum 2024- 2025 chhung khan Mizoramah state pawn lam mi khualzinmi nuai 5 chuang an rawn kal a. Tourism department chuan kum 2026 October-ah Anthurium Festival hman a ni leh dawn.
Mizoram Tourism department chuan Zirtawpni khan Aizawlah World Tourism Day an hmang a. Hmanpuitu Tourism minister Lalnghinglova Hmar chuan kum 2024- 2025 chhungin khualzin zaa 139.50-a an pung chu lawmawm a tih thu sawiin, Tourism department leh tourist service operator-te inpekna rah a ni tih a sawi.
Mizoram sawrkarin khualzin hipna atan nasa takin hma a la a, kum 2026 atangin festival /event langsar kan neihte awmze nei zawka kalpuiin, tourism calendar mumal tak duan a ni tih a sawi a. Khualzin hip thei hmun mawi leh tlawh chakawm thawmthata cheimawi mek zel niin, state budget pawn atangin project engemawzat kalpui mek a ni tih a sawi. Nakkum atangin horticulture lam hawiin Anthurium Festival kalpui tan a ni dawn, tiin, hmun nghet Reiekah hun nghet October kar hmasa bera hman a ni dawn tih a sawi a ni.
“Agro-based tourism, eco tourism, community-based tourism a pawimawh rualin, kan ram leilung mawina leh hnamzia pholanna atan kan local economy than chakna atan rel hmanga inkalpawh tawnna thar kan neih hman tangkai a ngai a. Hmathlir neia concert economy leh film policy changtlung ngaihven a ngai. Kan thenawma hnamdangte nena inthlunzawm a pawimawh a, kan hnamzia, mikhual chunga tha thin hnam kan nihna chawilianin, mikhual tlawh chak ram kan nih theihna turin economy siamthatna hmanrua atana tourism hman tangkai a tul a ni,” Tourism minister hian a ti.
Kum 12 chhunga Mizorama khualzin veivak punna:
Kum domestic foreign total punna%
2013-2014 64583 906 65489 –
2014-2015 67554 862 68416 4.47
2015-2016 66583 830 67413 -1.47
2016-2017 67223 987 68210 1.18
2017-2018 68679 1155 69834 2.38
2018-2019 88122 1644 89766 28.54
2019-2020 159534 2143 161677 80.11
2020-2021
(Covid) 20474 90 20564 -87.28
2021-2022 132099 517 132616 544.89
2022-2023 218457 3551 222008 67.41
2023-2024 215230 3884 219114 -1.30
2024-2025 518873 5911 524784 139.50