Nikumah tanpuitu 383 that, a zahve dawn Gaza-ah

Nikumah tanpuitu 383 that, a zahve dawn Gaza-ah
UN humanitarian chief Tom Fletcher-a chuan nikum chhung khan tanpui hna thawktu mi 383 thah an nih thu leh heng zinga a zahve dawn chu Gaza-ah a nih thu a sawi a. Hetiang zat mi tanpuitu thah an ni chunga ‘khawvel ramten hma an la lo’ chu zahthlak a tih thu a sawi.
Thawhlehnia World Humanitarian Day puala thuchah a sawiah Fletcher-a chuan a hma kum aiin nikum khan tanpuitu thah hi 31%-in an tam zawk tih a sawi a, ‘Gaza-a buainaah mi tanpuitu 181 thah an ni a, Sudan-ah mi 60-in nunna an chân bawk’ tih a sawi.
UN chuan thah zinga tam ber hi tual chhung mi an ni a, hna an thawh lai leh an chenna ina an awm laia thah an ni hlawm tih a sawi.
Aid Worker Security Database an tih, kum 1997 atanga UN-in report a siam thinah hian nikum khan tanpui hna thawktu mi 293 thah an ni a, kum 2023 khan tumah thah an ni lo thung a, a pung nasa hle.
Kuminah hian August 14 thleng khan mi 265 thah ni tawh anga chhinchhiah a ni a, finfiahna chiang tak erawh a la awm lo.
Kumina tanpuitu thahna lian ber chu Gaza chhim lama Rafah khawpuia Israeli sipaiten March 23 khaw var hmaa an thah kha niin damdawi thiam leh rikruma che chhuak chite chuanna lirthei beiin 15 an thi a ni.
Nikuma Israel leh Hezbollah indona chhuahna, Lebanon-ah mi 20 thah an ni bawk a, kum 2023 aiin a let dawnin an tam zawk.
Ethiopia leh Syria-ah mi 14 ve ve thah niin a hma kuma thah let aia tam an ni a. Ukraine-ah nikumah 13 thah niin kum 2023 khan paruk niin a let aia tam hretin a pung bawk.
Hetih lai hian UN hnuaia World Health Organization (WHO) chuan kuminah hian hmun 16-ah damdawi ina thawk beihna vawi 800 chuang a thleng tawh a, thawktu leh damlo 1,110 thah niin tam takin hliam an tuar niin a sawi bawk.
World Humanitarian Day hi kum 2003-a Iraq khawpui, Baghdad-a UN headquarters-a UN rights chief Sergio Vieira de Mello leh tanpui hna thawktu mi 21 thah ni-ah zel hman a ni.