Ningani zan Champions League

Result ngaihnawm tak tak a awm a, chu’ng zingah chuan a vawikhatna atana French club Brest-in an club chanchina Champions League match hnehna an sualchhuah kha telin, Monaco muala Barcelona an tlawm ruah bawk!
Brest 2-1 Sturm Graz
Stade du Roudourou muala mipui 14,518 pungkhawm hmaah first half leh second half tir lam ve vea Hugo Magnetti leh Abdallah Sima-te goal khat ve ve tihluh hmangin kum 20 lek liamta maia amateur level-a la tal lawp lawp Brest hian Europe club inelna lian ber match an khelh vawikhatnaah hnehna an sualchhuak nghal.
Tualchhung trophy lian lak pawh la nei lo Brest hian season liamta khan ropui taka hun hmangin Ligue 1 lamah pathumna hial an luah pha a, chu mi hmang chuan a vawikhatna atan Europe-ah an inlan theih phah.
An home ground ve chu Uefa lamin Champions League game khelhna tlaka a ruat loh avangin an khaw club dang Guingamp khelmual Stade du Roudourou-ah Brest hian an home Champions League game hmasaber khelin, hnehna hriat reng hlawh tawh tur an chang zui ta a ni.
Brest laka tlawm Sportklub Sturm Graz kha Austrian professional association football club niin, Graz khuaa inkulh an ni a; kum 1909 daih tawha din, Austrian Football Bundesliga lama khel an ni a, kumin hi 2000-01 season hnu lama Champions League group stage an chuankai leh vawikhatna a ni.
Monaco 2-1 Barcelona
|an atanga minute 10-na leka an player Eric Garcia hnawhchhuah kha Catalan team hian an tuar a tih loh theih loh ang a, hun tam zawk player 10-a khel chung chuan away-a tan khawh a har ve deuh bawk niin a lang!
Barca tlarhnunga ding fual ber a ni tawh tih inhriain Garcia khan Ter Stegen-a ball pass chhe zet umlut chunga goal khung zui mai tawh tura ngaih Takumi Minamino lakah professional foul an tih ang deuhin ‘foul’ a pawisa lo a, beisei lawk ang ngeiin straight red card hmanga hnawhchhuah a ni a, mikhual team tan kawng a bumboh zui ta a ni.
A tam zawk an nihna hlawkpuiin mualneitu lam hian minute 16-na lekah goal hmahruai an thun nghal a, Marc-Andre ter Stegen-a dan zawh loh goal hmasa zawk hi Maghnes Akliouche tihluh a ni.
Darkar chanve an khelh tlin hma lawkin Nou Camp club innghahna rawn ni chho ta mek Lamine Yamal chuan mikhual siphurh a sut a, Spaniard rawlthar Champions League goal hmasaber hmangin team pahnihin sikhat ve ve thun chungin chawlhlawk an hmang phawt.
Second half laihawl minute 71-ah rawlthar striker George Ilenikhena chuan a Champions League debut-ah rin loh zawk Monaco chakna goal ni zui ta a thun.
Nigerian kum 18 mi Ilenikhena khan second half tir lam minute 51-ah khelmual a lut a; Vanderson-a long ball pek hmangin Ter Stegen-a ven zawh loh goal nen Champions League goal a hlawhchhuak a, Yamal aiin a eng zawk tlat!
Kum 18 leh ni 34-a upa ni chunga chakna goal khungtu Ilenikhena kha Monaco tana Champions League goal thun thei naupangber niin, February 2017 daih tawha kum 18 leh ni 63-a upa ni chunga record hmasa siamtu Kylian Mbappe a hmakhalh ta a ni.
Nigerian vek kha he competition history-ah team hrang pahnih tana club khat laka game hnih chhung goal thun zawn thei hmasaber niin, nikum December thla khan Antwerp thuam inbel chungin Barcelona lakah bawk hian goal a lo khung tawh bawk a ni.
Inkhelh banah Barcelona manager Hansi Flick chuan an red card chawi khan game a tidanglam zo vek tih sawi chungin tlarhnung ven lam ngaihtuah lo thei lo an nih thu leh tah pawh chuan tihsual an neih thu a sawi a, theihtawp chhuaha goal thun tumin chance pawh tlem-a-zawng an nei tih leh mualneitu team khan chak an phu zawk tih a tarlang tel a, Pathianni La Liga lama Villarreal an luhkhung hunah khawng zawka kirleh an tum thu a sawi.
Ningani zan inkhel dangah Atletico Madrid chuan 2-1 bawkin an mikhual RB Leipzig an hneh a; Germany ‘Invincibles’ an tih mai Bayer Leverkusen pawhin 4-0 tehrenga Feyenoord sawp chungin Champions League campaign bul an tan ve bawk.