Nissan Magnite facelift

Nissan chuan an sub-compact SUV Magnite chu a facelift version vawiin hian an tlangzarh dawn a, booking Rs 11,000-in an lo kalpui reng tawh a, naktuk atangin an hralh chhuak tan nghal ang.
Magnite thar hi a design an tidanglam hret a, a feature an belh nual bawk. A thlalak leak atanga a lan dan chuan a design danglamna langsar ber chu a bumper, grille leh lighting-ah a ni. A teaser pic an tihchhuah tawhah chuan a tail light an tithar a, L-shaped DRLs a bumper ami chu a la awm tho bawk. Nissan chuan Magnite tharah hian a zawlpui ho zinga a hmasa ber thil chi rang hrang 20 chuang a awm dawn niin an sawi a, 55+ active leh passive safety feature a nei niin an tarlang bawk.
A chhunglamah Magnite facelift hi an upgrade nual dawn a, infotainment display lian zawk neiin, a instrument panel pawh an tithar dawn a, a seat upholstery pawh an tichangtlung lehzual a, safety package pawh an titha lehzual a, airbag pawh paruk a awm tawh ang.
A mechanical-ah chuan 1.0-litre, three-cylinder engine neiin, version chi hnih- naturally aspirated leh turbocarged a awm. Naturally aspirated engine hi 71 bhp leh 96 Nm torque pechhuak thei niin, turbocharged zawk hi 99 bhp leh 160 Nm torque pechhuak thei a ni ve thung. A transmission a danglam lo va, five-speed manual standard niin, naturally aspirated version-ah AMT a awm tel a, turbocharged-ah CVT automatic a awm tel bawk.