NIT campus Lengpui-ahhna chhunzawm leh hnai

Assam Rifles ram chhuahsan hmunah Aizawl Police Station dah rawtna chu a thuphunga pawm a ni a. Chhuahlamah kawngpui sial tum a ni a, mipui len khaw thawnna hmun zau siam tum a ni bawk.

National Institute of Technology Mizoram campus Lengpuia dinna tura harsatna awm chu sutkian mek a ni a, hna an chhunzawm leh hnai tawh tih sawi a ni.
Chief minister Lalduhoma kaihhruaiin DP&AR minister K Sapdanga, Higher & Technical Education minister Dr Vanlalthlana leh department hotute chuan Higher & Technical Education hmalakna thlirin an thukhawm a. Kum 2009 a Lengpuia NIT campus sak bul tan, kum 2017-ah forest clearance nei loa thawh vanga hna tihtawp a nih hnu ah, kum 2021-ah forest clearance dil a ni a, kum 2023-ah Mizoram sawrkar chu cheng vaibelchhe 20 chuang chawi tura tih a ni.
CM Lalduhoma hmalakna azarah Forest Advisory Committee chuan penalty hi vbch. 1.4 chawi turin a ti a. Sum chawi tur hi deposit vek tawh niin hna thawh chhunzawm theih thuai beisei a ni, tih sawi a ni.
New Education Policy 2020-in kum 2036 hmaa state university nei vek tura a tih angin, Mizoram State University neih tuma inruahmannaah, Aizawl-a college pahnih thum zawmkhawm a, school pali vel hawnga post graduate zirna bul tan tum a ni.
Mizoram State University (MSU) hmunpui atan tuna Geology & Mining ram, Luangmual ruahman a ni a, Geology & Mining hi MINECO ah hmunhma pek an ni thung. MSU hmunhma hi peih fel a nih hma chuan Govt. Aizawl College building Sikulpuikawn chu administrative building atan hman lailawk tha tih a ni a. A bul tan a, a tul apiang thawktu turte ruat (appoint) thuai a ngai dawn tih sawi a ni.
Assistant professor qualify lo thawh tir chungchangah, tunah hian part time 24, contract 3, Mizoram Polytechnic-ah 3 leh Govt Law College-ah 1 an awm mek a. Kumin July 3 khan show cause notice pek vek an ni. Part time-a thawk mi 10-in petition an file a, court thutlukna ngaihchan mek a ni tih sawi a ni bawk.
Thutkhawma sawiho dang:
8	Mizoram Polytechnic Lunglei-in harsatna a tawh mek sawi a ni a. Supreme Court hearing a awm hnai dawn a, tha taka inbuatsaih a ni.
8	Mizoram Engineer College chu nakum academic year atanga kalpui tumin hma lak a ni a. A hmunhma thawmthatnan Mizoram sawrkarin cheng nuai 2541.19 a pe. Hna an thawk tan thuai dawn a, civil, mechanical, electrical leh computer science & engineering course-ah seat 30 theuha bul tan tum a ni.
8	Mizoram Scholarship Board-in post matric (ST) scholarship-ah kum 2023- 2024 a dilna 31652 a dawnah, a hmu turin mi 27652 thlan an ni. Sum pek zat nuai 3497.69 a ni a, la pek loh 4000 chu additional fund hmuh huna pek an ni ang. Kum 2024- 2025 ah dilna 28471 dawn a ni.
8	Pre matric scholarship hi 2023- 2024 ah zirlai 8911-in an dil a, a dawng tur mi 8148 thlan an ni. Sum nuai 313.64 sem a ni tawh a, a la dawng lo 763 chu additional fund hmuh huna pek tur an ni. Kum 2024- 2025 ah zirlai 8807 in an dil.
8	State sawrkarin scholarship a siam bikah, post matric scholarship hi mi 58 hnenah Rs 3.77 lakh, Mizoram research fellow mi 7 hnenah Rs 64000, RIMC tanpuina mi 4 hnenah nuai 2.77 leh Sainik School Chhingchhipah naupang 233 tan nuai 280.42 pek a ni.
8	Mizoramah H&TE enkawl UGC approved college 23 an awm a. Grade A+ college 1, grade A college 3, grade B++  college 2, grade B+ college 2, grade B college 10 leh grade C college 2 an awm mek.