NIT Mizoram inawpna felfai lo chhuizui tum
National Institute of Technology (NIT) Mizoram inrelbawlna leh thil hrang hrang chu a felfai lo hle nia an hmuh thu Mizo Zirlai Pawl chuan sawiin, enzui an tum thu an sawi.
MZP Gen. Hqrs. hruaitute chuan NIT Mizorama hna lak thenkhat chu a dik tawk lo hle in an hria a, induhsakna uchuak leh tih tlin tum neisa rana lak a awm tih an hriat thu an sawi. Advertisment chhuah rual vek ni si, post thenkhat chauh lak bik, Board of Governor-in appointment approve an pek hmaa appointment order rang taka tih chhuah, hna exam thenkhat observer tel loa exam te a awm a. Advertisement chhuah tawh tam tak, tun thenga lak si lohte a awm tih sawiin, a mawhphurtu chhuizui an tum tih an sawi a ni.
Hnalak felfai loh avanga candidate thenkhatten High Court hial an thleng nia sawiin, hei hian hnalak fel loh zia a tarlang a. He instituion-ah hian sum hman dan fel tawklo tam tak a awmin an hre bawk tih an sawi. “CBI pawhin an chhui ngai hial khawpin sum hman dan hi a fel loa, mimal induhsakna uchuak tak hmanga sum siam tum an awm em tih enzui zel kan tum,” an ti.
He institution-a thawktu thekhatten an hnuaia thawkte an duh ang anga an tih theih loh vangin an vau thin nia sawi awmin, ban hiala invauna awm chu tha lo an ti a, hei hian an administration hlawhchham zia a tarlang chiangah an ngai tih an sawi.
Hei bakah hian kum 2012-a Lengpuia an permanent campus sakna tur lungphum phum tawh, kum 11 hnu ah pawh sak puitlin a la ni lo chu NIT Mizoram hian ngaihsak a hlawh tawh loh zia a tilang tih an sawi bawk.
NIT Mizoram chungchanga MZP sawi thenkhat dang
# Non teaching staff-te kaisan theih nan ministry-ah post sanction tura hmalakna liantham a awm ngailo niin hriat a ni a. Hetih lai hian zirtirtu erawh an ‘eligible’ lo chunga grade pay zuankhuma promotion pek a awm niin an hria.
# Zirlaite tana bus hire sak, bill pek theih loh vanga hun rei tak tak zirlaite kalvelna bus tlan theilo chu zirna in a tuar hle a. Institution inawpna leh sum enkawl kawngah an felfai lo hle tih a lan thu an sawi.
# Thawktute chhiatni leh thatni bakah an dikna chanvo humhalh turin tun thlengin Staff Welfare din a ni lo a. Chunglam atanga harsatna siam loa, staff welfare din thuai turin an duhpui tih an sawi.
# Thil fello a awm tih an hriat avangin uluk taka zirchiangin, institution chungchanga hriat duh an neihte RTI hmangin an zawt a. Zawhna an chhan danah MZP chu a lawmlo hle tih an sawi.