NITI Aayog duh dan bawhzui tur mithiam bik 9 sawrkarin la

NITI Aayog hmalakna bawhzui kawnga Mizoram Planning & Programme Implementation department tana thawk tur mithiam State Institute for Transformation (SIT) Team lead leh sector expert mi 9 chuan an hna thar an zawm a, Zirtawpni khan chief minister Pu Lalduhoma’n a kawm.
Chief minister chuan SIT hi a lo nghakhlel tawh hle tih sawiin, an chungah beiseina sang tak a nei a, sawrkar thar hmalakna hlawhtlinna tur tam tak chu an kutah a awm dawn tih a hrilh. Chief Minister Dashboard neih thuai a duh thu hrilhin duhsakna a hlan a ni.
State Institute for Transformation (SIT) Mizoramah hian Team lead bakah heng sector expert – livelihood, education & skill development, logistics, industry & investment, technology, evaluation leh project monitoring engineer expert lak thar an ni.
An ni hian Mizoram sawrkarin NITI Aayog duh dan leh Viksit Bharat 2047 tih hlawhtlinna, nasa zawka hmasawnna Mizoramin a neih theih nan kawng hrang hrangin hma an la dawn a; Zirtawpni vek khan an intuaitharna course zofelin, karleh atang hian hna an thawk tan dawn a ni.