No. 1 ni chunga a vawiriatna’na kum khar tur Djokovic

No. 1 ni chunga a vawiriatna’na kum khar tur Djokovic
|um 24 zet Grand Slam mipa champion ni thei awmchhun Novak Djokovic chuan mipa tennis world number one ni chungin 2023 ATP season a khar dawn a, chu chu a career-a a vawi-riatna a nih rualin record thar a ni nghal.
Djokovic hi kumina Grand Slam tournament paliah vawithum a cham-pion a; a hmasaber chu January thlaa khelh Australian Open niin, French Open (June) leh US Open (July)-in a zui. Flushing Meadows-a title a lak leh chiah khan mipa zinga major title 24 hawn thei hmasaber niin, kumin Wimbledon final-ah erawh a tlawm thung.
Kum 36 mi Serb hian Turin khawpuia mipa season kharna ATP Finals la lehin, he title vawiriat a lakna ni bawkah khan season tluana a elpui lian Carlos Alcaraz bawk a tukzal leh a nih kha.
Serbian hian tunkar Thawhtanni khan history thar a zawhna hmasa bul tanin chawlhkar 400 chhung ATP Ranking-a a sangber a nih tlinna a hmang tan a, chawlhkar 300 No. 1 ni pel ve dang awmchhun chu Roger Federer (310 weeks) chiah kha a ni.
Alcaraz ve thung chuan kum zawna Top 2 ni chungin season a khar a; kum 20 mi Holger Rune pawhin No. 8 ni chunga kum khar ve bawkin, kumin hi kum 2000 daih tawha kum 20-a upa Marat Safin (No. 2) leh rawlthar kum 19 mi Lleyton Hewitt (No. 7)-te hnu lama kum 20 leh a hnuai lam chin player pahnihin Top 10 luah chunga season an khar leh vawikhatna a ni.
Daniil Medvedev pawhin kum thum chhunga a vawihnihna atan No. 3 ni chungin kumin hian ATP season a hmangliam ve leh ta bawk.
Kum 22 mi Jannik Sinner pawhin a career-a a tawnsan ber hun thlengin No. 4 nihna nen kum a khar thei a, Toronto khawpuia a vawikhatna atana ATP Masters 1000 trophy a lak khan a dinhmun a chawikang a; chutih laiin Monte-Carlo lama ATP Masters 1000 title hlawhchhuak An-drey Rublev pawhin Top 5 ni chungin an veng lamah kumthar ruai a theh thei dawn!
Greek tlangval Stefanos Tsitsipas chuan a zawna a kum ngana atan ATP ranking-ah Top 10 finish changin, pa-rukna dinhmun nen kum a khar a; German player Alexander Zverev pawh nikum June thlaa kheimit hliam manganthlak tak a neih paltlangin kumin hian kum tawp ranking-ah pasarihna ni chungin Top 10 a rawn luah chho ve leh ta bawk.
Polish tennis player Hubert Hurkacz pawhin a zawna a kum thumna atan Top 10 ni chunga kum khar a puitlin ve leh a, pariatna Denmark player Rune Holger hnung chiahah pakuana luahin, Top 10 hnu khar chunga 10-na nena kum khartu chu American Fritz Taylor a ni.
2024 ATP Tour season chu tunthla, December ni 29 atanga khelh tan tur ram 18 inelna United Cup hmangin an tan chho leh nghal mai dawn a, Australia ram khawpui lian pahnih Perth leh Sydney lamah an khel ang.