Bollywood star pahnih Nora Fatehi leh Jacqueline Fernandez te inkar a chhe zual zel a, Nora hian Jacqueline leh media hrang hrang lakah defamation case file-in, a statement pawh Patiala House Court-ah a record thar. Nora chuan a statement-ah hian inbumnaa sum cha-lai kual vel thin Sukesh Chandrasekhar nena inngaizawng leh ‘gold digger’ angin Jacqueline Fernandez hian tum nei ran chungin dik lo takin a puh niin a tarlang a, Nora chuan pawnlam mi a nih avangin midang him nan amah chu tawktarhah an hmang ni a a ngaih thu a tarlang bawk.
Nora chuan hetianga intihhmingchhiatna avang hian a career-in a tuar a, a hming a hliau mai bakah sum pawh tam tak a hloh phah ni a sawiin, zangnadawmna a phut bawk a ni. Nora chuan tuna Enforcement Directorate-in Sukesh an manna, cheng vaibelchhe 200 chingpen chungchangah engmah hriat a neih ve loh thu leh inhnamhnawihna engmah a neih ve loh avangin he defamation case pawh hi file a nih thu a sawi bawk.
Nora chuan, “Jacqueline hian media hrang hrangah he case-a ED-in kei witness anga min tarlan laia ani tel ve a an puhna chungchang a sawi kualnaah, keiin tul lo taka nawr kualna, hna hloh leh cyberbullying thlengin ka tawh phah a ni,” a ti.
September 2022 khan Nora hi Delhi Police hnuaia Economic Offences Wing-in darkar li chuang thu an zawt fiah tawh a, ani bakah Nora leh Jacqueline te Sukesh nena inhmelhriat tirtu Pinky Irani chu thu an lo zawt fiah tawh bawk a ni. Sukesh hi tunah hian jail-ah a tang mek a ni.
Nora-i’n Jacqueline lakah defamation case a file
Get real time updates directly on you device, subscribe now.