Lee Isaac Chung film siam ‘Twisters’ chuan tun weekend kalta khan North America-ah cinema hall ticket hralhna atangin dollar maktaduai 80.5 la lutin, North American box office No.1 a ni. He film hian khuarel chhiatna (natural disaster) lam film tlangzarh tawh zingah North America-a opening weekend-a sum la lut tam ber record a siam. A hmaa hetiang record siamtu chu ‘The Day After Tomorrow’ kha niin, 2004 khan opening weekend-ah dollar maktaduai 68.44 a la lut thei).
‘Twisters’ hi Glen Powell, Daisy Edgar-Jones leh Anthony Ramos te channa niin, ‘Twister’ film hmasa zawk an tlangzarh atanga kum 28 hnuah a film thar hi an siam leh a, a film hmasaah khan Bill Paxton leh Helen Hunt an chang dun a, Jan de Bont direct a ni ve thung. A original film hian opening weekend-ah dollar maktaduai 41 a la lut thei a (tunlai pawisa hlutna nen dollar maktaduai 82 vel), khawvel huapin dollar maktaduai 494.5 (tunlai pawisa hlutna ang chuan dollar maktaduai 992.08 vel) a la lut thei bawk.
Twisters hi thlipui na tak niin, chu thlipuiin a nuai dan vel tarlanna a ni a, US pawnah dollar maktaduai 42.7 a la lut bawk a, tihian opening weekend a a lak luh zawng zawng chu dollar maktaduai 132.2 a tling a, he film hi dollar maktaduai 155 vel senga siam a ni.
Animated movie Despicable Me 4-in a weekend vawi thumnaah dollar maktaduai 23.8 la lut lehin No.2 a la ni thei a, he film hian US-ah dollar maktaduai 159.5 la lut tawhin, US pawna a lak luh nen chuan kar thum chhungin dollar maktaduai 574.4 a tlin der tawh.
Animated movie dang ‘Inside Out 2’ pawhin a weekend vawi ruknaa dollar maktaduai 12.8 la lut lehin No.3 a la ni a, he film pawh hian kar ruk chhungin US-ah dollar maktaduai 596.4 a la lut tling tawh a, US pawna a lak luh nen chuan dollar tluklehdingawn 1.443 a la lut tling ta a ni.
Horror movie Longlegs pawhin dollar maktaduai 11.7 la lut lehin No.4 a la ni a, he film hian kar hnih chhungin US-ah dollar maktaduai 44.7 a la lut tawh a, a film hi dollar maktaduai 10 chauh senga siam a ni.
Box office top 10:
1 Twisters $80,500,000
2 Despicable Me 4 $23,800,000
3 Inside Out 2 $12,800,000
4 Longlegs $11,700,000
5 A Quiet Place: Day One $6,100,000
6 Fly Me to the Moon $3,335,000
7 Bad Boys: Ride or Die $2,675,000
8 MaXXXine $819,242
9 The Bikeriders $700,000
10 Horizon: An American Saga Chapter 1 $685,000
North America-ah record siamin ‘Twisters’ thli a tleh
Get real time updates directly on you device, subscribe now.
Next Post