North Korea-in a hralh tur missile enchhin – South Korea

North Korea-in a hralh tur missile enchhin – South Korea
North Korea chuan an khawchhak tuipui kamah thui tak kap thei lo chi ballistic missile a enchhin tih South Korea-a sipaite chuan an sawi a, hralh chhuah tur atana enchhin a nih hmel niin Seoul hian a sawi.
North Korean sipaite hian khawchhak lam lawngchawlhna khawpui, Wonsan atangin Ningani zing dar 08:10 (India-a zing dar 04:40) atanga zing dar 09:20 (India-a zing dar 05:50) inkarah an kap chhin niin South Korea-a Joint Chiefs of Staff chuan Ningani khan a sawi.
Missile hi km 800 vela sang a thlawkin Sea of Japan-ah a tla niin JSC chuan a sawi.
Tun hi North Korea-in ballistic missile a enchhin vawi lina a ni ta a, January leh March inkarah khan missile chi hrang hrang a lo enchhin tawh a ni.
“Kan sipai, South Korea-US inkawpte chuan North Korean chet vel dan hi ngun taka thlithlaiin pawi a thleng em tih kan thlir a ni,” tiin JSC chuan a sawi.
JSC thupuangtu, Lee Sung Joon chuan an kah chhinnaah hian hralh chhuah tur missile-te chu ‘a that dan leh a thlawh ngheh dan’ an enchhin niin a sawi.
Lee-a hian heng missile-te hi khawi ramin nge lei dawn tih a sawi lo va, hetih lai hian Pyongyang hi Ukraine indona kal meka Russia puitu ber a ni.
North Korea hian Russia-ah hian missile, laipui leh sipai 15,000 vel a thawn niin South Korea-a National Intelligence Service chuan a sawi.
Indonaah hian North Korean sipai 4,700 vel thi emaw, hliam emaw an awm tawh niin intelligence service chuan a sawi.
Pyongyang hian thla hmasa khan Russia pui tura sipai an an tirh thu hi a puang tawh a, an sorkar chanchinbu chuan North Korean hruaitu, Kim Jong Un-a chuan ‘Ukrainian neo-Nazi-te leh Kursk huam chhunga mite chhu chimit turin Russian sipaite nen kan thawk dun’ tia a sawi chu an puang a ni.
Ram dang hruaituin an tlawh ngai loh tak, North Korea hi nikum khan Russian President Vladimir Putin-a’n tlawhin hetah hian ram venhimna lama inremna an siam nghe nghe.
Ningania missile enchhin hi Japan pawhin a dem hle a, Japanese Defense Minister Nakatani Gen chuan Tokyo-a thuthar lakhawmtute hnenah Pyongyang hmalakna chu an duh lo hle tih a sawi.