North Korea-in ballistic missile enchhin

An elpui leh hmelma ber pakhat, South Korea hruaituin an thawhpui tha ber, China a tlawh tuk chiahah North Korea chuan Pathianni khan ballistic missile a enchhin.
Missile enchhin hi Pyongyang hotupa ber pawhin a enpui a. Hei hian US President Donald Trump-a’n Venezeula beia President Nicolas Maduro-a man tuk chiah a nih bawk avangin khawvel boruak pawh a luah hle.
South Korea chuan President Lee Jae Myung-a’n Beijing a tlawhah hian Korean peninsula-a muanna a awm theihna tur atan tih a nih ber thu leh Xi Jinping-a nen pawh an inkawm dawn tih a sawi.
Pyongyang atanga Korea ram hnih leh Japan inkar tuipuia missile kah chhin hi North Korea-in China hnena South Korea kawmngeih loh tura a tihna thuchah niin mi thiamte chuan an sawi.
Seoul leh Tokyo chuan missile enchhin hi an dem thu an sawi.
South Korea-a presidential office chuan emergency security meeting an ko nghal a, North Korea chet dan chu ‘United Nations Security Council thutlukna kalha boruak duhawm lo siam tum’ niin a sawi.
Japanese Defense Minister Shinjiro Koizumi-a pawhin an thenawm rama muanna leh himna tihderthawn tum leh an chhehvel leh khawvela ramte inkungkaihna tihchhiat tumah a puh bawk.
Missile hi zing dar 07:50 (India-a zing dar 04:20)-a kah chhuah niin km 900 chuanga thui a thlawk niin South Korea-a sipaite chuan an sawi a. Japan chuan missile pahnih chu lm 900 leh 950-a thui a thlawk niin a sawi bawk.
Pyongyang-in ballistic missile a enchhin hnuhnung ber chu November 7 kha a ni.
Inrinni khan ralthuam siamna hmun tlawhin Kim Jong Un-a hian missile a leta tam siam turin a ti niin North Korea-a sorkar chanchinbu chuan a tar lang.
Tun hnaiah Kim-a hian ralthuam siamna hmun a tlawh nasa a, nuclear chakna hmang tuihnuailawng siamna hmunte pawh a tlawh tel a, hei hi kumina Workers’ Party Ninth Party Congress neih hmaa siam zawh hman tum a ni.