North Korea in balloon hmangin Seol khawlaiah lehkhaziak thahnem tak hnutchhiah

North Korea in balloon hmangin Seol khawlaiah lehkhaziak thahnem tak hnutchhiah
North Korea thuchhuah ni ngeia hriat, balloon tam tham zet hmanga phurh lehkhaziak chi hrang hrang chu Seol khawlaiah thehdarh a ni a, hetah hian an ram president leh a nupuite beihna inziak a tam hle.
South Korea president Yoon Suk Yeol leh a nupui, first lady Kim Keon Hee te beihna thuziak, khawpui chhung hmun hrang hranga tla darh hi North lamin ramri kaltlanga South lam an beihna hmanraw hmasa ber niin a lang.
An lehkha thawn luhah hian Yoon-a sorkar chu a hlawhchham hle a puh niin, an mite chu beidawnna khurah a hnuklut mek tihte a inziak a, an nupa chuan nuamtawl leh nungchang mawi lo, ram hruaitute tih atana mawi lo tak taka an khawsak thute tarlan niin, rilru nghet lo an nih thute a inziak a, lehkha thenkhat phei chu mawi taka graphic hmanga siamte an ni hlawm.
Pyongyang chuan South lam chuan drone hmangin an ram chung zawnah enthlak hna a thawk nia sawiin, an thuneihna an hmang sual a ti nasa hle a, hemi chhanlet nan hian balloon thahnem tak chhunga lehkhathawn hmang hian an thenawm ram hi a bei let phawt nia sawi a ni.
May thla tawp lam khan North hian an thenawm ramah hian balloon hmang thoin bawlhhlawh thahnem tak a lo thawn phei tawh a, heng bawlhhlawh zingah hian ek te pawh a tel nia sawi niin, tun hi ramri chungchangah boruak lum tak an neih leh hnua North lam chet hmasak leh berna a ni bawk.