North Korea-in missile kapchhuak

North Korea chuan Thawhtanni khan a ram khawchhak lamah ballistic missile a kapchhuak tiin South Korea military te chuan an sawi a. A hma ni lawkin North chuan US-in South Korea leh Japan te nena military exercise an neih chu a duh loh thu leh dodalna a lantir tur thu a lo sawi lawk tawh a ni.
South Korea Joint Chiefs of Staff chuan North Korea hian thawhtanni zing khan ballistic missile a kahchhuah thu sawiin mahse ralthuam chuan engtia thui nge a thlen tihte a kimchangin engmah sawi a nei lo.
North Korea missile kahchhuah hma ni hnih kalta khan South Korea, US leh Japan te chuan multidomain trilateral drill “Freedom Edge” hlawhtling takin an nei a. He sipai nunchan zirnaah hian US aircraft carrier, destroyers, fighter jets leh helicopter te pawh hman tel niin ram pathumte hian missile defense, anto-submarine leh maritime interdiction drills te an nei a ni.
Pathianni khan North Korea Foreign Ministry chuan US, SOuth Korea leh Japan te threee-way drill chu a demna thuitak tichhuakin, sipai nunchan zirna chu Asian version of NATO tiin US thil tum chu helai bial vel boruak tang zawka siam a ni a ti.
North Foreign Ministry chuan thuchhuah a siamah a sovereignty, security te chu ram mipui te leh helai region in muanna a hmuh theih nan a vawnghim tlat dawn tiin a sawi bawk.
Kar kalta Nilai khan North Korea chuan multiwarhead missile a lo kapchhuak tawh bawk a. He advanced weapon hi US leh South Korean missile defense tihchiatna tura siam a ti. North Korea chuan hlawhtling takin ralthuam a enchhin thu a sawi chu South Korea chuan a hnawlsak thung.
Tun hnaiah North Korea chuan bawlhhlawh dahkhawmna balloon tam tak South Korea lamah a chhuah tawh bawk a. Hei hi South Korean activist tena political leaflets an thehdarh chhanletna a ni tiin a sawi.