Norway tana goal khung hnem ber thar Haaland

Norway tana goal khung hnem ber thar Haaland
Manchester City striker Erling Haaland chuan kum 24 mi lek ni chungin Norway all-time goalscoring record ding lai a break a, karliamta Ningani zan daih tawh Nations League match pakhata sithum faia an mikhual Slovenia an hnehna inkhelah goal hnih khungin, ram tan goal 34 a tilut tling chiah a, kum 1920 leh ‘30 bawr chhoa international goal 33 thuntu Jorgen Juve-a record ding rei tawh tak chu a khum ta a ni.
Haaland hian kum 2019 mai khan Norway tan a khel tan a, tuna a mellung phun thar hi game 36 chhung leka a siam a ni nghe nghe!
Norway legend Juve pawh kha a duai bik lo a, Haaland-a lehpelh tak record hmasa kha match 27 chhung leka a puitlin niin, a career tawp lamah phei chuan pet goal-tu ni loin centre-back lamah a ding ta nghe nghe a, defender-a a inleh tak hnu hian goal khat mah khung belh loin match 45 dang a khel a, tlarhnung veng chungin ram tana inkhelh a bansan a, a khawsazia kha a mak ve mai mai!
Football a chawlhsan hnuin newspaper journalist hna a thawk a; Juve hian chanchinbua a ziah chhungin a record khumtu hming a tarlang hman lo a; kum 90 hnu, Ningani zan Ullevaal stadium inkhel minute 62-naa Jan Oblak kapkara goal lut chuan Norway record thar a rawn hringchhuak ta chauh a ni!
Martin Odegaard inhliam vanga captain banhren hreng chunga khelmual lut Haaland khan minute sarihna lekah goal hmahruai thunin record ding lai a nihrual a; second half tir lam minute 52-ah Alexander Sorloth chuan mualneitu team goal hnihna thawhin, minute 10 hnuah Norway record ding rei tawh tak khum turin City striker palian chuan mellung phunna goal a thawnlut a, ram tan match tina goal 0.94 zel thun tling angin statistics chhutnaah chhinchhiah a ni nghal.
Haaland-a goal 34 hi Portugal tana Cristiano Ronaldo international goal 132 tihluh tlin tawh te, Argentina tana Lionel Messi goal 109 phum tawh te, Harry Kane (England) leh Robbie Keane (Republic of Ireland)-a goal 68 thukphum tawhte nena khaikhin chuan a tam lua lo a ni mai thei a, mahse, ram tana goal khung hnem ber engemawzat goal erawh a khum tho a; Scotland top scorer pahnih Kenny Dalglish leh Denis Law-te goal 30 ve ve tihluh ai pawhin a tam zawk!
Haaland hian a club career lamah pawh chhiar tham ngial goal a thun tawh a, a club hlui pahnih Salzburg leh Borussia Dortmund baka City-a a thun belhkhawm chu goal 236 a tling tawh.
Manchester City tan pawh game 105 a khelh tlin rualin goal 10 a tilut tling tawh a; 2022-23 season khan Etihad team tan league goal 36 ngah tlingin, season khat chhunga Premier League goal khung hnember record a siam nghe nghe.
Germany rama a khawsak chhung pawh khan kum 21 mi lek ni chungin Bundesliga goal 50 thun tling thei player naupangber a lo ni tawh bawk.
Champions League lamah ni se khelh 35 lekah goal 40 a khawl tling leh der tawh!