Nou Camp-ah an midfielder hlui Romeu kirleh

Barcelona chuan Girona atangin an player hlui Oriol Romeu an hruaikir.
Spanish midfielder Romeu hian Nou Camp-ah kum thum daih tur contract a ziak tih Nilaini khan LaLiga champion chuan thuchhuah siamin an tarlang.
Romeu hian Barca youth academy atanga ei a tlin chhoh hnuah kum 2010 khan a senior team debut nghak-chhuakin, a kum lehah Chelsea a zawm a; tunah kum 31 mi ni ve tawhin, Southampton-a kum sarih a khawsak hmain Valencia leh Stuttgart lamah loan-in a lo khel tawh bawk.
Girona-a kuu khat a khelh chhungin minute 3,000 chuang khelmual chhung-ah hun a hmang tling a, a team chu season liamta khan Laliga lamah 10-na nihpuiin, Barca-a a kirleh rual hian kum 20-a upa midfielder Pablo Torre chuan Catalan team atangin Girona hi loan-in a zawm ve thung.
Barcelona chuan contract tawp hmaa Romeu leichhuak duh tana buyout clause-ah euro maktaduai 400 (USD 449.12 million) an ziak.
Romeu hi tun season liamta tawp hnua Barca player thar sengluh palina niin, a hmain Ilkay Gundogan leh Inigo Martinez an thlung fel tawh a, kum a thar ruala chhawr turin Vitor Roque pawh inremna an ziahpui tawh bawk.