Novak Djokovic an chak nghal

Novak Djokovic an chak nghal
Paris Masters khelh mekah World No. 1 Novak Djokovic chu nilai zan khan a vawi khat nan a inlan a, set hloh lova a khingpui Tomas Martin Etcheverry hnehin last 16 a lut. Djokovic a chak lai hian champion tura rinkai zinga mi Daniil Medvedev chu Grigor Dimitrov hneh lovin a tla ve thung.
US Open-ah a champion hnua mimal inelna hmachhawn lo vang vang Djokovic hi vawi ruk a champion tawhna Paris Masters-ah a vawi sarih nan champion tumin a inlan. Mimal inelnaa a kir lehna hmasa berah harsatna a tawk lova, a khingpui Tomas Martin Etcheverry a sawp. Djokovic hian set khatna tir lamah break a nei a, game thum hloh chungin set a la. Set hnihnaah tha zual zawka inlanin double break a nei a, game hnih chiah hloh chungin Etcheverry lakah hian 6-3, 6-4 in hnehna a chang zui ta a ni.
World No. 1 ni mek Djokovic hian No. 1 ni chung ngeiin kum khar a tum hle a, No. 1 ni chunga kum khar turin a dinhmun a tha sawt viau bawk. Paris Masters-ah hian No. 2 Carlos Alcaraz leh No. 3 Daniil Medvedev chu round of 32 paltlang zo lovin an tla a, hei hi Djokovic tan hlawkna a ni. Inelna neih mekah hian a champion thei a nih chuan ranking-a amah hnaih deuhtu Alcaraz leh Medvedev te nen an inkar a tizau leh zual thei dawn.
Awlsam tak Djokovic a chak lai hian World No. 3 Daniil Medevev chu inkhel hmuhnawm takah uiawm takin a chak lo va, entu mipui auhelna hnuaiah lunghnur takin khelhmual a chhuahsan a ngai.
Champion tura rinkai zinga mi Medvedev hian Grigor Dimitrov lakah bul a tan tha lova, set khatnaah game thum bak a la thei lo. Set khatna a hloh hnuin Russian hian na takin Bulgarian Dimitrov a bei let a, tie-break-ah chungnung hramin set a la let. Set khat ve ve an lak hnuin set thumnaah an inhnehtawk zui leh viau a, tie-break khelh a ngai nawn leh. Tie-break-ah Dimitrov a chungnung ta viau a, awlsam taka set la in Medvedev lakah 6-3 6-7 (4-7) 7-6 (7-2) in hnehna a chang a, last 16 a lut ta a ni.