November atangin Vairengte- Khamrang kawng black top

November atangin Vairengte-
Khamrang kawng black top
Kumin November atangin Vairengte atanga Khamrang inkar kawng chu black top hna tan a ni dawn a, thla 6 chhunga zawh an tum tih NHIDCL executive director Virender Jhakar chuan a sawi.
National highway kawng thamthat mek chungchangah Thawhlehni khan Kolasib district bawrhsap Robert C Lalhmangaiha chuan NHIDCL hotu hi a kawm a, NH 6 leh 306 an thawmthat mekah hma an lak tawh chin leh hmachhawp a sawipui.
Bawrhsap chuan Kolasib district tantlang NH 6 leh 306 chu state dang atanga Mizoram luhka ber leh state mamawh chawkluhna ber a nih avangin, lirthei tlan an tam a, hmang tangkaitu an tam tih a sawi a. National highway siam hna chu chak taka kalpui a nih theihnan leh tha taka siam a nih theihnan theihtawp chhuah turin a ngen.
NHIDCL executive director chuan national highway thawmthat hna, tunhnaia thawh tan tura ruahmanna awm sawiin, kawng tha tak siam a nih theihnan theihtawp an chhuah dawn tih a sawi a. Vairengte – Bilkhawthlir, Kolasib – Kawnpui leh Kawnpui – Khamrang chu kumina black top tur niin, November atanga thawk tanin thla 6 chhunga zawh an tum tih a sawi. A thawktu tur Balaji Construction aiawh pawh inkawmnaah hian a tel a ni.
Bawrhsap chuan chak zawka hna thawh theih nan district administration atanga an tih theih a awm chuan thlen zel turin a hrilh a. Monitoring Team hrang hrang leh tlawmngai pawlte pawhin an enpui tur thu leh a tulnaa pui turin an inhawng reng tih a sawi a ni.