NSS-in din champha lawm

National Service Scheme (NSS) Foundation Day vawi 55-na chu Thawhlehni khan Aizawlah hman a ni.
Hmanpuitu Youth Services minister Lalnghinglova Hmar chuan NSS thupui, keimah ni loin nangmah (not me but you) tih chu a Pathian thu hle tih a sawi a. NSS volunteer-te thisen unit pe tam ber an ni chu ropui a tih thu sawiin, midang tan malsawmna ni zel turin a chah. NSS-in adopted village-ah an neihah danglamna a thleng em, tih chu chonaa ngaia mahni inenlet a, tan lak a pawimawh tih a sawi a. Danglamna thlentu an lo ni lo a nih chuan statistics tipungtu satliah mai an ni thei tih a sawi a ni.
State NSS officer F Sangvuana sawi danin, tunah hian NSS volunteers 30100 an awm mek a. Mizoram college 29 leh higher secondary school 72-ah NSS unit 301 din a ni tawh. 2023- 2024 chhungin thisen unit 4900 pe in, thisen pek tam lamah pakhatna an ni. NSS volunteer-te hnathawh – public water point, vantlang inthiarna, luikawr leh vantlang shed tihfai leh siam hnatlang vawi 50 vel an nei.
NSS chawimawina chi hrang hrang hlan niin, National NSS Programme Officer Awardee – Joseph Vanlalhruaia (NSS programme officer, Synod HSS) hnenah appreciation certificate; St. John’s HSS Kolasib NSS programme officer Dr AJ Rajan hnenah
‘Lifetime Achievement Award hlan a ni.
Voluntary Blood Donation 2023-24 college category-a 1-na Pachhunga University College (unit 732), 2-na Govt. Hrangbana College (unit 451) leh 3-na Govt. Aizawl College (unit 424) bakah HSS category-ah 1-na Synod HSS (unit 276), 2-na Helen Lowry HSS (unit 93), 3-na Govt. Zemabawk HSS (unit 83) an ni. Thisen pe tam top 3 ho hian certificate leh sumfai an dawng theuh a; 1-na in Rs.5000, 2-na Rs. 3000, 3-na Rs.2000 a ni.
‘State NSS Award 2023- 2024’ – PU College NSS programme officer Dr Zothanpuia hnenah trophy leh Rs. 20000; Govt. Serchhip College-a NSS volunteer C Malsawmtluanga hnenah trophy leh Rs. 10000 hlan an ni.