*NSYNC an rawn comeback leh dawn

Justin Timberlake chuan *NSYNC-in hla thar an buaipui leh mek niin The Kelly Clarkson Show-ah a sawi a, fans lam an phur nghal khawp mai. *NSYNC hi an vanglaia khawvela group lar ber pawl an ni a, nikum September khan Trolls Band Together soundtrack atan ‘Better Place’ an record a, kha kha kum 20 chhung a he boy band hlathar ngaihthlak tur awm leh hmasa ber niin, tunah chuan soundtrack mai ni loin, singles thar an nei leh dawn ta.
Justin Timberlake chuan a bandmate JC Chasez, Lance Bass, Joey Fatone leh Chris Kirkpatrick te nen an comeback single tur hi an buaipui mek niin a sawi a, ‘Better Place’ an buaipui kha an hlim tlang viau a, chu chuan a tiphur thar niin a sawi a, “A nuam kan ti khawp mai, kan chawlhsan hnu atang khan thil tam tak chhar thar leh tur a awm tawh a,” a ti.
Timberlake chuan, “Studio lamah te pawh kan bur leh tawh a, chuvangin nakin lawkah thil thar eng emaw chu a awm beisei ila,” a ti bawk.
*NSYNC hi nikum VMA-ah khan stage-ah member kima inlanin, Taylor Swift hnenah best pop award an hlan kha a ni a, khata tang khan eng emaw tak a awm dawn nia rinna fans lamin an nei nghal tawh a ni.
*NSYNC hla thar nghah chhung hian Justin Timberlake chuan a solo comabeck single ‘Selfish’ chu kar kalta khan a tichhuak a, tun kum ruk chhunga a album hmasa ber tur ‘Everything I Thought It Was’ pawh March ni 15-ah a tlangzarh dawn tih a puang chiang tawh bawk.