Nu ni chunga top 10 huang luah thei Bencic & Svitolina
Nu ni chunga top 10 huang luah thei Bencic & Svitolina
Belinda Bencic leh Elina Svitolina-te chuan WTA ranking-ah history thar an siam ve ve a, nu ni chunga world top 10 huang luah thei hmasaber an ni.
Kum 28 mi Bencic hian April 2024 khan fanu Bella hringin, thla 11 zet nau neih chawlh a hman hnuah khelmual lut lehin, tun Australian Open khelh zawh takah khan second round a lut a, Thawhtannia ranking thar tarchhuahah Swiss player hian top 10 huang luahin number nine a ni chho ta hial a ni.
Kum 31 mi ni ve tawh Svitolina ve thung hian October 2022 daih tawh khan fanu Skai hringin, thla hmasa Australian Open-ah khan Aryna Sabalenka ngam loin final a thleng zo lo a, WTA ranking thar chhuakah pen hniha hma sawnin 10-na a luah chho.
Nu ni tharte tan nau an neih atanga kum thum chhunga tournament 12 an hmachhawnah nau neih chawlh an hman hma chiaha an ranking kha chhawm phalsak an ni.
Olympic champion hlui Bencic chuan a fanu a inkhelhsan leh theih rualin tennis level sang ber a k hel zui leh nghal thei chu a inchhuang hle tih sawi chungin, nu nih hnua zinkawng hautak zawk a zawh chhunzawmna kawnga amah thlawp tlattu a chhungte leh a team-te chungah lawmthu a sawi nghal.
Singles tour title 19 la tling ve tawh Svitolina hi French mihang player Gael Monfils-a nupui niin, a career-a ranking a luah san ber chu kum 2018-a world number three a luah kha a ni a; nu a nih hnua top 10 huang a luah leh thei chu chhuanawm a tih thu a sawi chhuak ve bawk.
Thawhtannia men’s ATP ranking thar tihchhuahah khan tennis player piang chhuak tawh zinga Grand Slam singles title 25 la tling thei awmchhun nih tumna Melbourne Park-a puitlin zo leh ta rih lo kum 38 mi Novak Djokovic chuan Alexander Zverev lehpelin number three a luah chho.
Tarlan tawh angin, Pathianni Australian Open final-ah khan major title 24 hawn tling tawh Serb hian record ropui bik hawlh thlak ngei tumin Carlos Alcaraz a hmachhawn a, set li inbeihnaah player naupang tha za zawk a ngam zo leh ta lo a ni.
Kum 22 mi lek ni chunga Grand Slam tournament hrang palia champion kim vek thei thei naupang ber ni ta Alcaraz khan major title pasarih la tling tawhin, ranking tharah pawh number one a luah chhunzawm zel.
Melbourne Park last four-a Spaniard hneh zo lo German Zverev chu ranking tharah hian palinaah chhukin, Australian Open semi-final pakhat zawka Djokovic laka tlawm Italian Jannik Sinner chuan pahnihna dinhmun a humhim thung.