Nuai 1000 la hman theih lohchhan chu inthlahdah vang

• MNF

Fisheries department kaltlanga sanga dil neitute puihna tur cheng nuai 1000 tun thlenga hman theih a la nih loh chhan chu sawrkar chetmuan vang leh Finance changtu chief minister-in a hna a enkawl hneh loh vang a ni tih MNF party chuan an sawi.
MNF Gen. Hqrs. thuchhuak chuan, kumin July 30-a ZPM thuchhuaha PMMSY kaltlanga Mizoramin cheng nuai 1000 a dawn tawh chungchanga thil awmzia an tarlang khan, an sawrkar chetmuan zia leh sangha dil neitute hmakhua an ngaih tawk loh zia a tarlang lek fangah a ngai tih a sawi.
Sawrkar hma atanga ‘tha bik, danglam bik’ ni tura insawi, research base anga kal tum, lehkhabu chhah hmanga sawrkar tuka kal tumten rahbi an tuk fuh loh zia a lang leh thin tih MNF hian sawiin, sawrkar laipui hotute ngaimawh khawpin an che pelh a, finance changtuin a enkawl hneh tawk loh zia a langchiang hleah an ngai a, sum enkawl thiam lo Finance minister kan nei tih a sawi a ni.
Hetiang harsatna hi department dang pawhin ZPM kaihhruai sawrkar hnuaiah hian an tawk foin a rinawm tih sawiin, ‘Sawrkar laipuiin kumin April-a sangha dil neitute tanpuina tur cheng nuai 1000 a rawn pek tawh, Mizoram sawrkar inthlahdah vang leh sum enkawltu leh a changtuin a vil hneh loh vanga hun rei tak tangkhang a ni tih anmahni thuchhuah hian a tarlang chiang a. Hei vang hian sawrkar laipui Ministry of Fisheries-a Animal Husbandry & Dairying Department of Fisheries secretary Dr Abhilaksh Likhi chuan kumin July 22 khan Mizoram sawrkar hnenah lehkha thawnin, PMMSY kaltlanga sanction tawh nuai 1000 hmanna tura hma an lak loh chhan a zawtfiah a ni,’ a ti.
Enkawl thiam loh avanga he sum hi tangkhang a ni tih sawrkarin lo hria se a duh tih MNF thuchhuah hian a sawi a. ‘Kalphung thar zuartu, road map neisaa kaltumte hi rim taka thawk, kuthnathawktute sum tur sawrkar laipui rawn pek an hnen thleng tura hna thawk tha lo, sawrkar laipuiin hma la thuai tura a rawn nawr ngai an nih avangin, hemi hian sum enkawl thiam lo Finance minister leh a puibawmtu kawnghmang hre tawk lo kan nei tih a chiang hle a. Insawifiah renga hun hman ngai lo turin an inzawrh ang ngeia hna thawk tawh turin ZPM kaihhruai sawrkar kan phut a ni,’ a ti.
Central leh opposition nawrkal chawp ngai sawrkar an neih avang leh sangha dil neitute hmakhua ngaiin, an sum dawn turte an hnena thleng thuai turin MNF chuan hma a la tih a sawi a. April 2025-a Mizoram sawrkar hnena mother sanction lo thleng tawh kumin July-a reminder thawn ngai sawrkar kan nei chu thleng nawn tawh lo se an duh tih a sawi a ni.