Nuai 200 hmanga ruihhlo do

Working Committee on Ruihhlo Do kaltlangin agency hrang hrang hnenah ruihhlo dona tur sumfai cheng nuai 200 tunhnai khan semchhuah a ni a. Tunhma khan ruihhlo do nana agency hrang hrang hnena hetiang zat sumfai semchhuah ang hi hriattur a la awm lo niin a lang a. He cheng nuai 200 hian engtiang taka nasain nge ruihhlo donaah hna a thawh kuak ang a, ruihhlo leh a kaihhnawih a tlakhniam phah dawn em? tih chu thlir tur a ni ta a ni.
Ruihhlo leh a kaihhnawihin Mizoram a chiah hneh tawhzia hi inhrilh chawp ngai lova mi tinin a practical-a ni tina kan hmuh leh kan hriatsa vek a ni. Heti tak maia ruihhlovin min chiah hneh ta mai hi, a doletna kawngah tanrual a ngai a, mutmawh hnarmawha kan neih a tul takmeuh meuh tawh a, mi tin hian kan vei tlan a, kan tanrual hle loh chuan, kan hmabak hi a thim thei hle dawn a ni.
Hetih lai hian, ruihhlo dona kawngah sawrkar hnuaia force awmsa Excise & Narcotics leh Police department-te hi chu, ram venhim hna thawk tura sawrkar hnuaia thawk mek an nih avang hian, an hlawh leh hna an thawhna tura mamawh senso tur hi chu budget-ah a awmsa tura beisei a ni a. Chu chu an lo indaih lo deuh a nih pawhin, a lehpekah sawrkar chuan a tul angin budget-ah a dah zel mai tur niawm tak a ni a. Hetia agency dangte nena duang khata hlum hi thil nih dan tur a ni chiah em tih pawh ngaihtuah theih tak a ni awm e.
Ruihhlo donaah hian, supply reduction a pawimawh tluk bawka pawimawh (a pawimawh zawk mah awm e) chu demand reduction hi a ni. Demand reduction-a hmalakna hmasa ber tur pawh, naupang, nikhua an hriat theih tirh atanga bul tan a ni. Ruihhlo thatlohna leh hlauhawmna an thahnan theihna tura hmalak (brainwashing) hi systematic deuha kan kalpui a pawimawh. Naupang thanglai, kum la tling lote hi chhia leh tha la hre tak tak lo an nih avangin a tul chuan nawrluih deuha hmalakna (forcible means) pawh kalpui mai tur a ni. Ruihhlovin heti taka min chiah hneh tawh chuan, ruihhlo thatlohna leh hlauhawmna hian naupang thang lian mekte hi a chiah hneh ve mai tur a ni.
Supply reduction chungchanh pawh hian, tualchhung a lo luh tawh hnua manchhuah hi a tha, a pawimawh em em; chutih laiin, a lo luhna Khan Pui ber (ramri) lamah kan inzarpharh that hle a pawimawh. Lawng chhuat pawp thawl phui tum lova, a pawpa tui lut chauh lo suah chhuah kan tum chuan, tlin loh hun a awm nge nge thin. Ngawrh lehzuala ramri hrula patrolling beihpui thlakna nena kan tan a ngai hle a ni.