Nuggets leh Suns in semi-final an lut

Nilai zing khan NBA play-off khelh chhunzawm a ni a. Denver Nuggets leh Phoenix Suns ten an khingpuite ve ve hnehin semi-final an lut. Inkhel dangah Atlanta Hawks in Celtics an hneh a, se,mi-final luh theih beiseina an nei chhunzawm zel.
Series-ah 3-1 a hmahruai a, semi-final lut tura vawikhat chak chiah mamawh tawh Denven Nuggets hian Minnesota Timberwolves lakah bul an tan tha lova, quarter khatnaah point 7 in hnufual zawkah an tang nghal. Bul tan tha lo mah se quarter hnihnaah Nuggets an insiamtha a, point 8 a chungnungin an khingpuite an lehthal a. Point khata hmahruai chungin chawlhlawk an hmang.
Chawlhlawk hnu lamah an inhnehtawk chhunzawm viau a, quarter thumnaah point khatin Timberwolves an chungnung ve leh a, quarter hnuhnung ber khelh a nih dawn thlengin hmahruaitu zawk an awm lova, an point hmuh a inzat. Quarter linaah chak zawk nih ngei tumin an khawh nasa dun viau a, semi-final lut tura chak mamawh Nuggets chu point thumin an chungnung hram a. Point 112-109-a hnehna changin semi-final an lut ta a ni. Nuggets hian semi-final-ah Phoenix Suns an hmachhawn zui leh ang.
Nuggets in Timberwolves an hneh nawn leh theih nan NBA Most Valuable Player ni mek Nikola Jokic a chetha leh viau a. Jokic hian point 28 a thawhchhuah bakah ball sawhlet vawi 17 a dawng a, assist vawi 12 nei tling bawkin tre-ble doubles a puitlin. Western conference-a top seed Nuggtes tan hian Jamal Murray chuan point 35 a thawkchhuak tling bawk.
Nuggets hmachhawn tur Suns hian play-off ah vawi thum an lo hneh tawh Los Angeles Clippers chu point 136-130 in a vawi lina atan an hneh a, semi-final an inhlangkai. Clippers an hneh nawn leh tum hian Devin Booker chuan point 47 zet a thawkchhuak. Suns hian game khatnaa Clippers an hneh lo hmasa zet a, game hnuhnung paliah chak zawnin semi-final an lut ta a ni.
Eastern Conference lamah semi-final lut tura tlawm thiang tawh lo Atlanta Hawks chuan an beiseina chhem alh lehzual turin Boston Celtics chu point 119-117 in an hneh.
Semi-final lut tura vawi khat chak chiah mamawh tawh Celtics hian Hawks hneh nawn leh tumin thapui an thawh a, quarter hnihna leh quarter thumnaah chungnung zawk ni ve ve mah se a tawp an khar fuh thei lova, point thum lekin an khingpuite an awm umphak lova, game nganaah an tlawm. Clippers an chak leh tak vang hian series-ah 3-2 in Celtics in hma an la hruai a, semi-final luh tuma innelna boruak a nung thar lehzual.