Nuho hnenah ruihhlo
lama an hriat tur hrilh
MHIP Gen. Hqrs leh Aizawl District Nasha Mukt Bharat Abhiyaan (Drug Free India Campaign) tangdun chuan Thawhlehni khan Thuampui MHIP member-te tan ruihhlo lama an hriat tur hrilh pahin a thlawna inentirna an buatsaih.
Hmanpuitu Social Welfare minister Lalrinpuii chuan chhungkuaa ruihhlo ti an awmin a tuar nasa ber chu nute an ni tlangpui tih sawiin, “Hma kan lakna kawngah pawh nute hnena zirtirna pek hi kan thlahthlam thei lo. Ruihhlo ti mek kan buaipui lai hian ruihhlo la ti ve lote venhim kawngah pawh zirtirna kan pek nasat a ngai hle,” a ti.
Khawtlang leh kohhranah theihtawpa kan inhmang a nih pawhin, mahni chhungkua hlamchhiah lo a, engkim bul intanna chu chhungkua a nih avangin chhungkuaa mahni tih tur leh mawhphurhna theihtawpa hlen chhuah tum turin nute a sawm tih a sawi a ni.
Aizawl District Nasha Mukt Bharat Abhiyaan chairman, bawrhsap Er Lalhriatpuia sawi danin, MHIP nen tangdunin nikum khan Aizawl veng 7-ah mi 690 hnenah ruihhlo chungchang hriat tur an lo inhrilh tawh.
“Chhungkuaa ruihhlo ti nei an awmin chhungkaw member naupang ber atanga a upa ber thlengin an tuar a, an chhiatpui thin. Chuvangin ruihhlo ti ngailo chhungkua pawhin ruihhlo that loh zia inzirtir tam a pawimawh,” a ti.
Inzirtirna atan chhungkuaa nuten mawhphurhna sang tak an nei, tiin, an fate mizia leh ngainat zawng hre bertu an nih angin, an fate nungchang zirchiang a, ruihhlo laka an fihlim zel theihnan theihtawp chhuah turin a chah bawk.
Sawrkar laipui Ministry of Social Justice & Empowerment leh AIIMS New Delhi tangdun chuan kum 2019 khan India ram puma ruihhlo hmansual dan an zirchiannaah Mizoram hi India ramah opiods kaihhnawih (heroin adt) hmansualah kan sang ber tih sawi a ni. Ministry hian ram puma ruihhlo hmansual hluarna bik thlang chhuakin tih reh a nih theihna tura campaign hi chhawng hnihin a kalpui a ni.
Nuho hnenah ruihhlo lama an hriat tur hrilh
Get real time updates directly on you device, subscribe now.