Nuihza siamnana Pu Zoramthanga an hman thinna kha a tak a thleng ta – Er K Lalsawmvela

Nuihza siamnana Pu Zoramthanga
an hman thinna kha a tak a thleng ta
– Er K Lalsawmvela
Tunhmaa Pu Zoramthanga sawi thin, JCB tlang lawn thei leh leiverh a tih, nuihza siamna atana thenkhatin an hman thin kha tunah chuan a tak a thleng ta tih MNF hruaitu Er K Lalsawmvela chuan a sawi.
Zirtawpnia Mizo Hnam Run inkhawmah MNF general secretary Er K Lalsawmvela chuan, Aizawl Bypass Sihhmui atanga Tlawng kama kala Muallungthu-a chhuak tur chu MNF sawrkar sawichhuah, a hranpa ngata kum 2022 Union Budget-a lang, PM-Devine atanga cheng vaibelchhe 500 leh Bamboo Link Road pilot project atana cheng vbch. 100 dah a ni tih a sawi.
Scheme thar a nih avangin guideline siam chhung, pawmpuitu chhawng tam vang leh a tlawh tur ram tihfel hmasak ngai avangin sanction a tlai a. ZPM chu MNF kuhmumah a par ta a, tuna thawh mek a ni chu a lawmawm hle tih a sawi a ni.
Aizawl Bypass nothern side, Sairang chhak, four lane tawp chiah atanga intan a, Bawngkawn Brigade field hnuai atanga lei verh a, Muthi bula chhuak a, Phaibawk kawn vela kawngpui pawh tur chu kawng kal dan tur NHIDCL-in pali an ruahman chhin a, khatihlaia chief minister Pu Zoramthanga duh dan ang taka ruahman chu tunah thawktu tur contractor thlan fel vek tawh a, Muthi-Seling lam tan a ni tawh tih a sawi.
“Tunhmaa Pu Zoramthanga sawi thin, JCB tlang lawn thei leh leiverh a tih, nuihza siamna atana thenkhatin an hman thin kha, tunah chuan a tak a thleng ta a. Leiverh panna leh a chhuahna lam contractor thlan fel vek hnu leh, leiverh pawh tender chhuah diam hnuah, ‘Leiverh tur bik cancel mai tur, minister hnena a sawi avanga sanction leh ta’ anga thu diklo sawi duh CM kan nei hi a vanduai thlak a, kha thu an hriat khan NHIDCL hotute nuih a tiza hle,” a ti.
PWD engineer -in- chief hlui Er K Lalsawmvela chuan, Lunglei Bypass pawh Congress term tawp dawn kar khat lek awmah, km. 19.20 turah km 4.77 chauh atan cheng nuai 900 an sanction a, awmze awm tham lo a nih avangin MNF sawrkar khan kawng zal leh tha zawk ni turin DPR thar cheng vbch. 262.45 a siam a. Beisei anga sanction hmuh a nih mai loh avangin NHIDCL kuta hlan a ni a. An ni hian double lane turin tunah DPR an siam peih tawh a, sanction nghah mek a ni tih a sawi. Sawrkar kum tharah hmalak tum niin, hei pawh hi MNF kut chhuak a ni tih mipuiin lo hre lawk se a duh tih a sawi bawk.
Dutlang- Sihphir kawng cement concrete road chu Pu Zoramthanga kut chhuak liau liau a ni tih a sawi bawk a. Sawrkar tirh atanga a buaipui, sum ruahmanna lama harsatna avanga central-in a sanction lawk loh, BRO kawng a nih avangin an ni’n phalna an pek har vanga tlai ta zawk a ni, tiin, tute emaw chuan an sawrkar kut chhuak angin an sawi leh ta nia a hriat thu a sawi.
Thingtlang khua zawng zawng pawh tur PMGSY, scheme chu thawh hnihna thleng zawh a ni tawh a, tunah phase III thawh mek niin, phase III hi 2020- 2021 atanga bul tan tawh niin, central-in a duh khirh avang leh kaihruaina a siam anga kal a ngaih avangin MNF sawrkar tawp lamah sanction a chhuak chauh a. A vaiin kawng 17 thlan bik km 487.50 atan sum santion a ni a, tunah thawh mek a ni tih MNF hruaitu hian a sawi.
“Hei pawh hi tute emaw chuan an sawi chhuah, an bial tana an nawr vak avanga tel ta anga sawiin hmingthat lak an tum a, ZPM sawrkar hmaa sanction vek a ni,” a ti.