Nun dan mawi inzirtir-ah zirtutute …

Nimina MZP hruaitute leh zirtirtu pawl hrang hrang hrang inrawnkhawmna neihah resolution pali siam a ni a. Chung zingah chuan, ‘thangthar ten nu leh pa leh aia upate chunga nun dan mawi lantir an chhawm nun zel theih nana tan lak’ tih a tel a.
Hei hi upa pawl (MUP) chuan an veina a rei tawh hle mai a. Tunhmaa pi leh puten aia upa zahna an lo lantir thin ang kha thangtharte zingah a lo tlahniam ta hle tih an hmu a, hnam nun dan tha leh mawi chhawm nun zel a nih theih nan tan pawh an la nasa a. Khawlai hmun hrang hrangah leh zirna in bulah te, ‘aia upa zah’ chungchang inzirtirna thuziak hrang hrang poster an tar thin a; hei hi tun thleng pawhin hmuh tur a la awm hlawm bawk.
Zirlai naupangte hian zirtirtute thu hi an awih ber a, an zah ber a, an hlau ber bawk. A nihna takah chuan, nu leh pa ai pawhin an hlau ti ila, kan uar lutuk hauh lovang. ‘Zirtirtuin chuti chuan a ti’ an tih tawh chuan an ngaihdan sawhsawntir theih a ni mang mang tawh lo thin.
Hei hi zirtirtute pawimawh em emna chu a ni a. Hma lam huna zirlaite dinhmun leh nihna tur chhertu an nih ang bawkin, tuna kan sawi mek, hnam tih dan phung tha leh mawi vawng tlat tura inzirtir bakah, vantlang tana nun dan tha (civic sense) thlenga inzirtirna kawngah, zirtirtuten tih takzeta thahnemngai taka tan an lak phawt chuan, kar lovah thalaite hian an zawm thei nghal maiin a rinawm.
Aia upa zah thiam em em Korean film en nasa hnam kan ni awm e. Khawlai, office leh puipunna hmuna thalaiten aia upate an zah dan leh an tih dan hmu thin kan ni. An va fel tak, kan ti liam mai. Mahse, zirtirtuten zirlaite hnenah, khawlaia aia upate an tawh dawnin zahna lantir nan upate kawng lo ken a, an kal liam hmaa lo din leh zahna chibai lo buk te leh, hetiang kaihhnawih hrang hranga nundan mawi an zirtir a, an endik zui peih ngat chuan, zirlaite hian rei lo te hnuah tihdan phungah an nei nghal maiin a rinawm.
Tuna thalaite zia hi chu, kawng chep tak foothpath-a inlehpelh dawn pawha aia upate su her sawk sawk duh khawpa nun dan mawi hre tawh lote an ni a, zirtirtute leh zirlai pawl ten tih takzeta tan an lakho theih phawt chuan awmzia a nei thui hle ang tih a rinawm.