Nunna Par

ZR Lalthlanmawia

A nawmsakna tur leh hamthatna tur a ngaihtuah hman lo va, a hma a sial ve ngai hek lo va, a hmaah chuan hlauhawmin hmun a chang ngai hek lo. A mahah chuan hmingthat leh lansarh tumna ten hmun an chang lo va, mawihnai lo takin a che ngai lo va, hrehawmna pawh a ti hrehawm zawka, tuarna pawhin a ni chu a tuar zawk thin. Chhelna chu awmphawah hmangin, harsatna leh manganna hmunah a par a parh zuala, a mawi zia lah hrilhfak a ni fo thin.
Dinhmun hlauhawm karah pawh hma a hruaia, a sahimna aiin mi dang nunna a ngai pawimawh zawk thin. A mahah chuan harsatna tawktute aia pawimawh an awm a remti ngai hek lo. A inlâr chhuahna hmunah chuan nunna a chhan chhuaka, harsatna hmuna awmte a tanpuia, hmun râlti leh hlauhawmah pawh a mizia a thup thei lo va, a tlanchhe ve ngai lo .
Kangmei chhuak leh Tui lianah te, leimin avanga chhiatna rapthlak thlengah pawh thlamuantu leh puitu a ni a, ei leh inah pawh mahni hrawkhrui tlaina aiin mi dangte puar leh fanna a ngai pawimawh zawk thin a; hlauhawm leh hmun tihbaiawmah pawh par fung a chawia, mawi takin a par vul chûk thin. Par a chhuanna hmunah chuan hmangaihna, khawngaihna leh lainatna thlifim a lêng heuh heuh va, a thla zar hnuaiah chuan thlamuanna, hlimna leh lawmna te pawh a serh zinga a mei ang an ni thin.
A par zu thlum dâwt turin sawm bik leh thlei bik a nei lo va, hnam tin chi tin ang khata kuangkuahin, duhsakna zo puan ze mawiin a tuam mawi thin. Damlo mangangte tan a thlâwnin thisen a pe a, tlachhamte hnenah an mamawh phuhrukin, silhpuan nei lote hnenah silh tur a pe bawk thin. Fak leh chawimawi a phut ve ngai lo va, mi dangte tana malsawmna nih chu a chaw tui ber a ni reng fo thin.
Zofate Hla Kungpui Pu Rokunga chuan, “Hmanah pi pu lenlai ni khan,
“I hmel ni ang a eng thin a;
“Kan ram kan hnam ti mawitu kha,
“Thliah hnu chhawl ang a chul zo ta,” tiin, zo nun ze mawi tlawmngaihna, hlo bet anga ah thlûka awm mek leh thliah hnu chhawl anga uai mek nia a hriat chu ngaingam lovin, hla mawi leh hnuk fan raihin NUNNA PÂR chu alo kurpui hial tawh nghe nghe a nih kha.
Zirsangzela hnamte va zawt veleh ila, “Zo nun, zo nun mawi,
“tap tapin ka au ding zo si lo;
“Zo nun, aw nun mawi, liam lovin la cham rih hram rawh aw,” tiin; thlang lenkawla tlai ni her liam tur ang maia zo nun mawi tlawmngaihnain min her liam san tur nia hriain a lo au ve lawm lawm bawk a nih kha.
Ni e, he nun mawi leh nun ropui, Pu Rokunga vekin, “Aw nunna par” a lo tih hial TLAWMNGAIHNA hi, a humhalhtu leh vawngthaa chawi nungtu YMA hi awm ta lo sela, eng ang takin zofate nun hi awngrawp chhe tawh ang maw le?
Pianthar san chi a ni lo va,
Kohhrana inhman san daihchi a ni lo.
Sumdawn san leh Sawrkar hnathawh san chi a ni lo va.
Senior san chi a ni hek lo.
Intih changkan san chi a ni hek lo.
Tlawmngaihna vawngthaa, humhalha chawi nungtu, YMA hi zofate tan liau liau va Pathian min pek a ni a, YMA hmusittu leh sawichhetu chuan mizoram leh hnam a hmusitin a sawichhia a ni. Mizo kan nih chuan YMA hi nghet takin vuan zel ang u. YMA DAY vawi 89-na min hruai thlengtu Pathian hnenah lawmthu awm sela; YMA Day chibai vek ule.
YMA DAM RENG RAWH SE.