Nurse zirchhuak leh zir thar turte pual

School of Nursing Thingdawl (SONT) Kolasib chuan an school hmunah Ningani khan General Nursing & Midwifery (GNM) 7th batch zirlaite lukhum khumtira khawnvar chhi-a thutiam lak leh 4th batch SONT atanga zirchhuakte certificate hlanna an buatsaih.
Health & Family Welfare principal director, Directorate of Nursing director ni bawk Dr Vanlalsawma chuan a hmanpui a. Joint director (Nursing) Lalchhanhimi’n 7th batch zirlai tharte lukhum khumtirin khawnvar a chhittir a; thutiam an sawi rual a ni.
Kumin Mizoram Nursing Council examination-a 1st year topper Lalremruati hnenah Lalchhunga (L) Memorial Award chu donor, SONT principal Laltanpuii’n a hlan a. SONT Kolasib atanga top 10-a lang – 2nd year zirlai pahnih leh final year zirchhuak pahnih hnenah chawimawina (merit prize) hlan a ni bawk.
SONT Kolasib hi December 2017 khan zirlai 20 awma bul tan niin, batch 4-in an zirchhuak tawh a. Principal bakah tutor 6, non-teaching staff 9 leh zirlai 60 an awm mek. Tun tumah hian 4th batch zirchhuak (graduate) mi 20 awmin, 7th batch 1st year zirlai 20-in thutiam an la thar ve thung.