Nute duat bakah zah turin chah

Mahni nute chu duat mai duhtawk loa, zah tel turin minister Lalnghinglova Hmar chuan a chah.
Inrinnia MHIP Day lawmnaa MHIP Kanan Branch-in an buatsaih a hmanpuinaah, bialtu MLA ni bawk Lalnghinglova Hmar chuan, hmeichhe pual bik ni ah hian nu ropuina leh pawimawhna kan zir thar a ngai, tiin, “Mahni nute kan duat mai hi a tawk loa, kan zah tel a ngai. Chutiang bawkin hmeichhiate zahawmna kawng tinrenga kan humhim hi mitinin kan tihmakmawh tur thil a ni,” a ti.
MHIP chuan kum 50 chhungin nasa takin hmeichhiate dinhmun chawikan kawngah, ram leh khawtlang siamthat kawngah nasa takin an thawh tih a sawi a. Chhungkuaah hmeichhiate mawhphurna leh pawimawh dan sawiin, “Kan rama buaina tam tak hi chhungkua atanga intan leh irchhuak a ni fo thin. Nuten chhungkuaah pawimawhna lian tak kan nei a, kan mawhphurhna hi engtik lai pawhin kan hriat thar reng a pawimawh,” a ti.