Nute pualin ram pumah thing phun runpui kalpui

Sawrkar laipui Ministry of Housing and Urban Affairs ruahman angin, World Environment Day denchhena AMRUT Mitra (AMRUT leh DAY NULM tangdun) hnuaia thing phun runpui, ‘Women for Trees’ campaign chu Ningani khan BSUP Complex Lawipu-ah UD&PA minister K Sapdanga’n a hawng. Minister chuan thing phun beihpui thlak piahlamah thing phun sa chawmnun a pawimawh tih a sawi a. Thing phun tam kawnga hma hruai tura ruat, hmeichhe self help group (SHG) te chu he hna thawk tur hian an chak tawk tih a sawi. Khawvel boruak chhiain a kentel khuarel chhiatna tam tak lakah thing phun hmangin kan inveng thei tih a sawi.
SHG member thlanchhuah 27 hnenah thing phunna tura an mamawh an sem a. BSUP Lawipu-ah pawh hian thing phun a ni.
Women for Trees campaign thupui chu “Ek Ped Maa Ke Naam” a ni a, a awmzia chu “Nu Hmingin Thingphun Pakhat” tihna a ni. UD&PA department ruahman dan chuan, he programme-ah hian SHG 112 atangin member 517-in thing tiak 1149 an phun dawn a ni.
Phase-I hnuaiah thing phunna hmun tur thlan niin, Mizoramah chuan khawpui 10-ah, hmun 46-ah phun tum a ni. Aizawl bikah chuan BSUP Complex pathum – Lawipu, Edenthar leh Durtlang bakah RAY Complex Falkland-ah phun tum niin, Phase-II chu tuna bul tan tak, a taka thing phun tan a ni a, August thleng a awh dawn. Phase-III ah chuan SHG member-ten thing phun hi an enkawl zui dawn a ni.
“Ek Ped Maa Ke Naam” campaign hian leilungin thilsiam a enkawl dan leh kan nuten an fate an enkawl dan a inmil hle a ni tih a tinzawn. He campaign hmang hian ram tih chereu leh tihdanglam, thing tlem vanga ruahtui tlem thei laka inven, ramngaw humhalha ram pum huapa thingin a bawh chin tih pun chu thing phun hmanga hlen tum a ni.
Aizawl bakah district hrang hrang leh hmun thenkhatah hemi pual hian hun hman niin, thing phun a ni.