Obamas ten Harris thlawp thu sawi
Michelle Obama leh Barack Obama te chuan Democratic National Convention neihnaah Kamala Harris chu an thlawp thu puangin US a party supporter te chu November inthlana Donald Trump hneh a nih theih nan an tiphur hle bawk.
“Beiseina a lo let leh mek” tiin Michelle Obama chuan Chiacago a DNC a pungkhawm mipuite hnenah sawiin a pasal campaign laia ‘beiseina leh inthlakdanglamna’ tih chu a tuihnih a ni.
Democratic Party a milar ber ber pahnihte hian Kamala Harris chu fakin Trump erawh sawiselin a presidency hun lai chu ‘tawng chapo leh buai nuai nuai’ in a khat tiin Barack Obama chuan a sawi.
Obama te nupa chuan party member te chu inthlanah inhnehtawk taka inbeihna a thleng mek tia sawiin inthlahdah lo tur leh Harris campaign-ah phur turin an ngen bawk a. Inthlan chu swing state pawimawh tlemte in hril dawn tiin an sawi bawk.
“Tihsual nei suh u, inbeihna a thleng dawn” tiin kum 63-a upa Obama chuan a sawi a.
Kum 60-a upa Michelle Obama pawhin, “Rinhlelhna awm thei nuaireh nan a tam thei ang berin vote kan thlak a ngai a. Min rahbeh tumtute kan hnehchhilh a ngai a ni,” tiin a sawi bawk.
Obama chuan America chuan ‘bung thar’ kai a inpeih tia sawiin, “President Kamala Harris tan kan inpeih a, Kamala Harris pawh hnathawk turin a inpeih,” tiin a sawi bawk.
National polling average-ah Harris chu Trump aiin a chungnung hret mek a, mahse pollster te chuan inhnehtawk mek tia sawiin battleground states thenkhata che tha zawk zawk chuan America electoral system-ah chakna an chang dawn a ni.
Harris chu incumbent candidate a ni zawk chungin mahse amah chuan a running mate Minnesota Governor Tim Walz nen underdog-ah zawk a inchhuah thung.
Obamas te chuan President Jode Biden an presidential candidate atanga a inhnuhdawh hnuah party chhungah phurna nasa zawk a awm chu a pawm thu sawiin ‘Beiseina a lo let leh mek’ tiin Michelle Obama chuan a sawi bawk.
Michelle Obama chuan an chhungkua a sawisel zuina zelah na taka beiin Trump chu ‘mysogynistic, a racist dawt sawi chuan mipui te nun tha zawka siam thei ideals leh solution tha ber ber te a hliah a ni’ a ti bawk.
Michelle Obama thusawia mipui tena an lawm ber leh thangkhawk nasa ber chu Trump-an a campaign naa ‘black jobs’ tia a sawi a nuihsawh chu a ni.
“Tuin nge Trump hi a hna chelh tum mek hi black jobs a ni thei asin tia hrilh ang le” tiin a pasal Obama presidency chungchang a sawi bawk.
Democratic convention-ah hian Second Gentleman Dough Emhoff, Harris pasal chuan mimal chanchin sawiin vice-president nena kum 2013-a a client pakhatin blind date hmanga a inhmelhriattir dan a sawi a.
Emhoff chuan a nupui hmasa laka a fa Cole leh Ella te nen ‘chhungkua inngeih leh lian leh mawi’ an neih thu sawiin Harris chu ‘joyful warrior’ tia sawiin a hna hautak tak karah chhungkua thil dang zawng aia dah pawimawh tiin a sawi bawk.
“Ka nuna hun pawimawh takah Kamala hi ka tana mi pawimawh diktak a ni” tia sawiin Emhoff chuan, “tun hun kan ram history a hun paiwmawhah hian president atana mi pawimawh leh dik tak tur a ni” tiin a sawi bawk.
Hetih lai hian Donald Trump leh a running mate JD Vance te chuan swing state pawimawhah Democrats tena Chicago a inhmuhkhawm an neih lai hian rally an lo nei ve mek bawk a.
Thawhlehni chawhnu lam khan Vance chuan news conference Wisconsin a a neihnaah Harris chu a vice-presidetn ah a hlawhchham tiin a sawi.
Crime leh public safety leh economy chungchang sawi chhuakin heng thil pahnih te hi Republican tena Democrats te an duhkhawplohna leh hlawhchhama an ngaihna lian ber a ni bawk.
Kum 2020 a mihang Jacob Blake Kenosha city a police tena an kah avanga lungawilohna lantirna chungchang sawiin, “Mi tha, smart leh pro-public safety leh leadership neihloh avangin Wisconsin-in a tuar a ni, hei tak hi Donald Trump White House luah tura kan duhna a ni reng a ni,” tiin Vance chuan a sawi.