Oct. 23 atangin kawng dan tum NHIDCL laka thinurna a sosang

Vairengte leh Bairabi atanga chak lakna kawng, Kawnpui leh Durtlang Road thlengin, kawng chhia thawmthat hna a chak loh em avanga lungawi loh lantirna atan leh chak zawka siamthat phutna atan heng kawng hi dan a ni dawn.Hetihlai hian helai kawng, national highway enkawltu NHIDCL lakah truck-a eizawngte thinurna a sosang zel a, October 25 thleng an lungawina khawpa hna an thawk lo a nih chuan an chungah engpawh thleng se an mawhphurhna a ni lo tih an sawi lawk.
Mizoram Tipper Association District Hqrs Kolasib leh Joint Action Committee Kolasib chuan, tun dinhmunah Mizoram chak lakluhna kawngpui Vairengte – Sairang leh Bairabi – Kolasib inkar chu hnawh mek ni mah se, an hnathawh a chak tawk lo a, tun anga an kal chuan kumin mai pawh ni lo, nakkum fur hma pawhin an siam zawh a rinawm loh tih an sawi.
Heng avang hian NHIDCL leh Mizoram sawrkarin tun aia chaka kawng thawmthat hna thawk ngei turin an phut tih an sawi a. He kawng hi sub-grade atanga siama thawk turin an phut tih an sawi.
Chak taka hna an thawh theihnan leh he kawngpui pawimawh tak hi ngaihthah a nih em avanga lirtheia eizawngten lungawi loh lantirna atan October 23 zing dar 7.00 atanga October 26 tlai dar 4.00 thleng Vairengte – Sairang leh Bairabi – Kolasib, Kawnpui leh Durtlang Road-ah lirthei eng chi mah tlan lo turin an ngenin an hriattir tih an sawi a ni.
Kawngpui tha an duh avanga an nawrhna Mizoram mipuiin kan zavai atana tha zawk tur a ni tih hria a, thlawp turin an ngen tih an sawi a. Kawng dan chhung hian ambulance, magistrate, emergency duty leh tul bik thilah mahni awmna veng VC/ YMA hriatpuina lehkha nei chu hriatthiam an ni dawn tih an sawi lawk a ni.
Mizoram Truck Owners’ Association leh Mizoram Truck Drivers’ Association pawhin Kawnpui leh Sairang inkar NHIDCL enkawl kawngpui chu hun engemaw chen tlan hleihtheih loh khawpin a chhe ta tih an sawi a. Ruah a tlak tawh loh hnu pawhin tih tak taka thawh a awm lo nia an hriat thu sawiin, truck a tlu-in a chhiat phah nasa tawh hle a. An pawl member-te tawrhna leh thinurna a sosang tawh, tiin, October 25 theng an ngaih chan hnuah hmalakna liantham an hmuh loh chuan, NHIDCL chungah engpawh thleng se sawi theih an nei lo tih an sawi a ni.