October 16-ah Congress & BJP la inchingfel kim lo
November 7-a Mizoram MLA inthlanpui neih turah candidate-te tan October 20 thleng nomination thehluh theih hun a ni a. October 16 thleng khan Congress party leh BJP chuan an official candidate tur an la puang kim thei lo. Vawiin – October 17 hi chuan inchingfel kim tawh tura ngaih an ni.
Indian National Congress hian Mizoram State Assembly-a bial awm zawng zawng, bial 40 chuh kim an tum a; hetihlai hian October 16 khan All India Congress Committee general secretary chuan bial 40 awma bial 39-a an party candidate tur tih chian tawh chu a tichhuak a, Lunglei South bial-a an party candidate tur a la tel lo.
The Aizawl Post thudawn danin, Lunglei South bial vil tur leh ding tur hian ex-minister Lalhmingthanga fanu Meriam L Hrangchal chu party hotute lamin an tifel tawh a, campaign pawh ngawrh takin a kalpui tawh. Hetih lai hian candidate list zingah midang rualin tihchhuah a ni nghal loa, a chhan nia rin zingah Mizo Zirlai Pawl-in hnamdang nupui/pasal nei MLA candidate-a dah an awm chuan na taka do an tum thu an sawi vang nia ngaih theih a ni. A pasal hi Mizo ni lo nia sawi a ni.
Congress party lam atanga thudawn danin Lunglei South-a an party candidate tur hi vawiin, October 17 hi chuan tihfela puan a ni tawh tho tho dawn nia sawi a ni.
Bial awm zawng zawng chuh tum lo BJP pawhin October 16 thleng khan an party official candidate tur an la puang lo a. Vawiin – October 17 hi chuan an puang hman tawh turah an inngai tih an party atanga thudawnna chuan a sawi.
BJP buaina hi tunhnaia an party-a lut thar dinna tur siamrem mai theih loh vang niin The Aizawl Post chuan thu a dawng. Assembly speaker, MNF MLA atanga bang ta Lalrinliana Sailo chu Mamit biala din tum a ni a, he bial hi 2018 MLA inthlana BJP State general secretary Malsawmtluanga din tawhna leh tun inthlana din leh a tumna a ni. Mamit district-ah vek hian Dampa-ah BJP State president Vanlalhmuaka din a tum bawk. Mamit district-a bial dang Hachhek chu Congress MLA Lalrindika Ralte leh amah khingtu tur MNF candidate Robert Romawia Royte inbeihna tur nia ngaih a nih avangin, midang tan hmun leng tawh lo hiala ngaih theih a ni thung. Heng boruak velah hian BJP hian candidate an siam fel mai thei lo nia sawi a ni a, vawiinah chuan inchingfel tawh tura ngaih an ni.