ODF Plus-ah hmarchhak bikah Mizoram pahnihna

ODF Plus-ah hmarchhak bikah Mizoram pahnihna
Thingtlang faina leh thianghlimna kawnga pawnlera inthiar awm lo tura beihna, ODF model plus-a hmalakna bikah hmarchhak state-ah Mizoram chu pahnihna a ni mek.
Sawrkar laipui Jal Shakti minister CR Patil hoa hmarchhak state tin aiawh minister-ten Swatchh Bharat Mission-Grameen (SBM-G) hnuaia hmalakna chu Guwahati-ah an thlirho a, Mizoram PHE minister Prof. Lalnilawma a tel.
SBM-G hnuaia NE state hrang hranga hnathawh dan leh hmalakna thlirhoin, hmarchhak state-ah Mizoram sawrkar chu a ti tha pawl ni mah se, hmasawnna tur tam tak a la nei tih sawi a ni a. Hma sawn a ngaihna zawnah hian nasa zawka tan lak an tum thu minister Prof. Lalnilawma hian sawiin, amah pawhin department-te nasa zawka enpui a tum tih a sawi a ni.
Union Jal Shakti minister chuan hmarchhak state-ten harsatna hrang hrang karah theihtawp chhuaha faina leh thianghlimna kawnga hma an la leh, hemi rahchhuah tha tak hmuh a ni chu lawmawm a tih thu a sawi a. Individual Household Toilet dilna ni 30 chhunga buaipui hman a, tuna la khaihlak mek chu ni 15 chhunga zo hman turin a chah.
Thutkhawma tarlan danin, NE state-ah thingtlang khua zaa 51 chuan ODF Plus model dinhmun an thleng tawh a. ODF model status-ah Sikkim titha berin 100% dinhmun a thleng. Mizoram-in dawtin 86% a thleng tawh.
Sustainable solid and liquid waste management, community sanitary complex, plastic waste management leh faecal sludge management hmalakna kawnga ngaihven tul bakah fund hman dan leh hmanna chunchang bawhzui dan sawiho a ni.