Odisha State-in Cabinet Rank neih belh
Chief Minister Naveen Patnaik kaihhruai Odisha sorkar chuan voluntary-a sorkar hna chawlhsan ta IAS Officer VK Pandian chu Chairman, 5T (Transformational Initiative) and ‘Nabin Odisha’ atan a ruat thar a, he hna hi state cabinet rank a ni. Odisha state General Administration Department chuan a thuchhuah ah, “Shri V K Pandian hi 5T (Transformational Initiative) leh Nabin Odisha Chairman atan ruat niin hei hi Cabinet Minister rank a ni.
Shri Pandian hi Chief Minister hnuaiah a hna hi a thawk nghal ang” tiin. Pandian hi Chief Minister Naveen Patnaik Private Secretary-a awm mek niin a sorkar hna hi voluntary retirement-in a kalsan ta a ni. Central sorkar-a Department of Personnel and Training chuan State GAD hnena an lehkha thawn ah voluntary retirement an pawm thu sawiin, “hna bansantu-in hriattirna a pek State sorkar-in a pawm angin” tiin an remtih thu an rawn hrilh a ni.
Pandian hi 2000-IAS officer batch niin Odisha cadre a ni a. Chief Minister thawhpui langsar ber te zinga mi niin thubuai hlabuai rem reng rengah amah CM kutke ber a ni a, opposition party-te chuan he a dinhmun hi political thila hlawkna umin a hmang sual niah an puh ve thung a ni. Opposition BJP leh Congress te chuan State chhunga mipui lungawilo vawi 190 zet a hmachhawn tawh te a tlawh kim leh vek hnuah sorkar hna bansan sela pangngai takin BJD party zawm mai turin an ti a.
Congress MP Saptagiri Ulaka phei chuanin Pandian hian state inthlan leh hunah chief Minister charge pawh hi lo la ta se mak ka ti lo ang ti hialin a lo sawi tawh a ni. “Heng hi Odisha-ah chuan rorel dan kal hmang a ni a, mi tumahin thil thlen dan hi an chhui chhuak thei lo ang. Dan pangngai aia chak leh sorkar chawlh ni thum chhung lekin Voluntary Retirement Scheme hi pawmpui a ni a – Super Fast” tiin a Tweet-ah a sawi a ni.
Pandian dinhmun siamrem a nih chungchangah hian Congress hruaitu hlun Jairam Ramesh pawhin a ngaihdan sawiin, “Civil servant mi tha leh fel tak niin nasa takin Naveen Patnaik a pui a. Mahse Pandian dinhmun siksawi a ni hian thatna tam tak a nei a ni, danin a phut ni miah lo hna langsar tam tak a thawk te (de facto) kha dan hnuaiah a nihna ang takin hnathawh lang lo mah se a khawih tawh anga (de jure), de facto kha de jure a lo ni mai dawn a, Pandian chu ama mimal dikna chanvo ang ngeiin politic-ah mi challang a lo ni mai dawn a ni.
He thil danglam tak mai hi Odisha-ah chuan kum sawm chuang lai mai a lo awm tawh a, CM chu ram neitu hming lang lo ang niin amah puitu ber chu State CEO ang maiin a khawsa thei a ni,” tiin a sawi ve bawk.