Oil chhiah tihpun atanga hman an tum ang hi kan ti ve ngai lo – Dr R Lalthangliana

Oil chhiah tihpun atanga hman
an tum ang hi kan ti ve ngai lo
– Dr R Lalthangliana
ZPM sawrkarin oil man an tihpun chhan, kawng siamna’n leh school siamthatna’n hmang tur anga an sawi chu MNF sawrkar laiin an ti ve ngai loa, sawrkar laipui atanga sum an pawh chhuah thin zawk thu MNF hruaitu Dr R Lalthangliana chuan a sawi.
Sinlung Hills Council inthlan tura campaign MNF senior vice president chuan Kolasib leh Aizawl inkar kawng siamthatnan tax tlingkhawm hmasa sawrkarin hmang tura a insawi chu a ngaihna an hriat loh vangah a ngai tih a sawi a. ZPM sawrkarin oil man a tih pun chhan, kawng leh school siamthatna’n hmang tur anga an insawi chu MNF hunlaiin an ti ve ngai lo tih sawiin, “Kawng leh school siamthatna tur chu central ministry atangin sum kan pawt chhuak thin,” a ti.
Chief minister kalchhuak ta Pu Zoramthanga’n adviser pahnih chauh a neih laiin, inrenchem viau tur anga insawi Pu Duhoma chuan adviser to chief minister 5 a nei a, an staff-te hlawh leh senso a tam turu tih a sawi a. ZPM a sawrkar chuan MLA hamthatna a zahvea tihtlem an tum thu an sawi chu khawvela thil thleng thei lo tluk hiala an tihpun nasat thu a sawi bawk.
“Kan puk ve loang, titute chuan cheng nuai hlir nuai 2768.3 vel an puk tawh a, an sawi loh ang hlirin an awm. Chief minister-in ‘motor pakhat bak a kawl lo ang’ a tih thin kha, chief minister a nih hnuah lirthei panga a kawl leh si. An campaign laia chief minister leh an minister thusawite kha a video-a hmuh tur a la awm vek a; electric bill, tui bill leh chhiah chi hrang hrang an tih pun loh tur thu an sawi a. Sawi loh ang hlirin an kal,” Dr R Lalthangliana hian a ti.
ZPM hotute thusawi chu a thu ringawt chuan a tha thin hle a; a taka nunpui an nei leh si lo tih MNF hruaitu hian a sawi a. Thu tha sawi ringawt ai chuan a taka nunpui leh thil tha tih a hun tawh tih a sawi.