Oil man sang leh depot sawipui

Oil man sang leh
depot sawipui
BJP State president Vanlalhmuaka chuan Union minister of Petroleum & Natural Gas Hardeep Singh Puri hmu in Mizorama oil man sang chho zel mipuiin an tawrh dan leh oil chhekkhawlna tur depot a rang lama mamawh a nih dan a thlen.
New Delhi-a central minister hrang hrang dawrtu BJP Mizoram president hian Union minister of Petroleum & Natural Gas hnenah hian state-in tuialhthei chhekkhawlna an neih loh avanga a chawkluhnaa harsatna awm thin a hrilh a; kawng a chhiat hlekin tuialhtheia harsatna thleng thin hrilh in, a rang thei ang bera Mizorama oil depot siam a nih theih dan tur, tuialhthei man sang chho zela mipui mimirin kawng hrang hranga an tawrh dan a sawipui. Union minster hian ziaka chhinchhiahin, hma lak a nih dan tur a lo hrilh a ni.
Union minister of state for Prime Minister’s Office Dr Jitendra Singh hnenah State BJP hruaitu hian Mizoram dinhmun hrang hrang, Prime minister hnena thlen ngaite a sawipui a. A tul dan azirin kumin November-ah Prime minister nen sawi dun ngai a awm chuan sawi dun turin rawtna a thlen.
Union MoS for Home Affairs Nityanand Rai pawh Vanlalhmuaka hian hmu in, Mizoram venhimna kawnga thawktu hrang hrang dinhmun, tunhnaia Assam Rifles leh Mizoram minister inkara thil thleng, Myanmar leh Bangladesh buai avanga raltlan leh ramri hung chungchang chenin a sawipui a ni.