Oil palm chingtuten VGP dawng tan Godrej-in oil palm refinery din a tum

India sawrkarin oil palm chingtute an palm rah an hralhna atanga an hmuh tur ang chhut lawk an hnawhkhah sakna, viability gap payment (VGP) chu tunlai hian Mizorama oil palm chingtute hnenah a pe mek a, cheng nuai 200 chuang a tling tawh tih sawi a ni. Hetihlai hian Mizorama oil palm tharchhuah leitu ber Godrej Agrovet Ltd chuan oil palm atanga tel herchhuah leh thlitfimna tur bun a tum mek.
Hriak ei chia India a intodelh theihnan ramchhung hmun hrang hrangah sawrkar laipui hmalakna in NMEO-OP (National Mission on Edible Oils – Oil Palm) Scheme kalpui a ni a. He scheme-ah hian North East state-a oil palm huan siamtute chu a bika duhsakna pek niin, farmer-ten oil palm rah an hralh tam dan azir zelin tanpuina, Viability Gap Payment (VGP) pek an ni.
India sawrkar chuan kumtin ‘oil palm year’ ang zela a rah hralhna zat, viability rate a siam bakah oil market rate ang zelin oil palm hralhna rate hi thlatin a danglam a, hetianga oil palm year khat zela oil palm hralhna sum, a chingtuten an dawn phak lohna – viability gap hi NMEOOP scheme atangin oil palm chingtuten a rah an hralh tam dan ang zelin an bank account-ah sawrkar hian a rulh/ hnawhkhah sak thin a ni.
Hetianga oil palm huan siamtuten kum 2022- 2023 chhunga oil palm rah hralhna atanga VGP an dawn tur hi tunlai hian sawrkar laipuiin farmer-te bank account-ah a dah sak mek a; Kolasib leh Mamit dictrict-a oil palm farmer-ten an oil palm hralhna man an lakluh sawi tel loin, VGP atanga an sum dawn hi a vaiin cheng nuai 200 chuang a tling. Hei bakah hian 2023- 2024 chhunga an hralhna atanga VGP an dawn tur pawh nuai engemawzat a la awm tih sawi a ni.
Oil palm hi sawrkar dan mumal tak hnuaia kalpui a nih avangin farmer-ten a rah an hralhna bakah central scheme atangin tanpuina hrang hrang – maintenence cost, intercropping, half moon terrace leh transportation atan an dawn bakah oil palm chi phuntur a thlawna pek an ni. Hmanrua an mamawh ang pawh scheme atang hian ngaihtuhsak thin an ni bawk.
Hetihlai hian Godrej Agrovet Pvt Ltd. chuan Mizorama oil palm chingtute tharchhuah a pun theihna turin farmer-ten an mamawh an hmuh theihna One Stop Solution, Mamit leh Kolasib district-ah an siam mek tih an sawi a. Mizorama oil palm thar chu hmun hla taka refine tura thawn buai ngai lo turin Godrej Agrovet Company hian Kolasib district-ah oil palm refinery din turin ruahmanna a siam tawh tih an sawi.
Agriculture & Farmers Welfare joint director Lalringliana chuan environment a tih chhiat hlauhna avanga Mizoram-in oil palm kan buaipuia kan vei ang hian khawvelin vei thamah a ngai lo tih a sawi a. Mizorama oil palm chin theihna anga lang zawng zawngah hian a chin theih loh avangin environment tichhe phak tur khawpin oil palm chin theihna ram kan nei lo tih a sawi. Mizoramah oil palm chinna atan ramngaw thiah a awm lo tih a sawi bawk.
Mizoram chu hmarchhaka oil palm seed garden nei awmchhun a nih avangin, nakum vel atang chuan state pawnah oil palm seedling hralhna atangin Mizoram sawrkar chuan kumtin sum tam tak a lalut thei dawn tih a sawi a ni.