Oil tharchhuak tam ramte chuan oil siakchhuah tihtlem remtiin kumin May thla atangin kum 2023 kum tawp thlenga kalpui tur a ni a. Heng ram zingah hian Saudi Arabia, Iraq, Uited Arab Emirates bakah Russia te pawh an tel a ni.
He thutlukna siam hian crude oil man a tisang nghal a. April 3 khan Organization of the Petroleum Exporting Countries (OPEC) te chuan 48th meeting of the Joint Ministerial Monitoring Committee an neihah oil siakchhuah tihtlem an remti a. OPEC+ ah hian core member ram 13 bakah oil tharchhuak hnem ram 10 te an tel bawk a. Tuna ruahmanna an siam hi October 2022 a ruahmanna an lo siam tawh bawhzuina zel a ni bawk.
-- Advertisement --
Eng vangin nge OPEC+ tena crude oil tharchhuah tithlem an tum?
OPEC tena thuchhuah an siamah chuan market ngelnghet siam an duhna avanga oil siakchhuah tihtlem remti an nih thu an sawi a. February 2023 khan Russia chuan khawthlang ram tena Ukraine indona avanga an oil man a bithliahsak chhan let nan nikhatah barrel million zahve bak a siakchhuah tawh dawn loh thu a sawi a. Russia Deputy Prime Minister Alexander Novak chuan oil siakchhuah tihtlem chuan ram dangte nena market lama inzawmna an neih te a siam tha ang, a ti.
G-7 ram te chuan December 2022 khan Russian crude oil man bithliahah barrel-ah $ 60 tur a ti a. “G7 leh EU Member States tena thutlukna an siam hian Russian revenue khawih na dawnin Ukraine indona a kalpuina nasa takin a tibahlah ang” tiin khatihlai khan European Commission President Ursula von der Leyen chuan a sawi a. “Global energy price ngelnghet zawkin a siam bawk ang a, chu chu ram tin te tun dinhmuna oil man sang tuar mek te a chhawk vek dawn a ni,” tiin a sawi bawk.
Chutih laiin tun hnaia US leh Europe-a banking sector in harsatna a tawh te, Silicon Valley Bank tluchhia te, Credit Suisse talbuai te chuan recession a awn hle tih a ni bawk a. March 2023 khan oil price chu kar hnih chhung 1% in a tlahniam a, chu chuan recession siamin oil demand a hniam rinna a siam a. Mithiamte chuan oil siakchhuah tihtlem chuan international market-ah crude oil man a tisang dawn an ti nghal a. Oil siakchhuah tihtlem chu short seller te oil price tlakhniam tur sawi lawk tute hremna tur an ti bawk.
Oil siakchhuah tihtlemin awmzia a nei thuk thei em?
Volunatry adjustment siamah Saudi Arabia chuan ni khatah oil siakchhuah 5,00,000 barrel-in a titlem dawn a, Iraq-in 2,11,000 in, United Arab Emirates-in 1,44,000 in, Kuwait-in 1,28,000 in, Kazakhstan-in 78,000 in, Algeria-in 48,000 in, Oman-in 40,000 in leh Gabon ten 8,000 barrels in an titlem ang. October 2022-a nikhata siakchhuah barrell maktaduai hniha tihtlem belhna a ni a, Russia chuan a hmain ni khatah barrel 5,00,000 in a lo titlem sa tawh a ni.
US chuan OPEC te thutlukna chu sawisel thungin, “Keini’n kan tum ber chu energy market-in economy thang mek zel te thlawp theiin a man tihhniam ni se tih a ni,” tiin White House official te chuan an sawi.
India a nghawng dan tur?
World Energy Outlook 2021 data ang chuan India chu China leh US tihloha crude oil chawlut hnem ber ram a ni a, crude oil production lamah chuan tharchhuak hnem ram 21-na a ni a, natural gas production nei tam ber ram 26-na a ni bawk.
Tichung chuan India chuan a energy mamawh phuhruk turin ram dangah innghatin a chawlut nasa hle a. February thla khan India-in Russia atanga crude oil a chawkluh chuan a san ber lai tawngin ni khatah 1.6 million barrel a chawlut hial a. Chu chu a chawkluhna ber Iraq leh Saudi Arabia atanga a chawk luh belhkhawm ai pawhin a tam zawk a ni.
Russia-in oil a thawnchhuah India rama a pun tak thur thur chhan hi Ukraine a run hnua khawthlang ram tena an hrekna nghawng a ni bawk. US leh Europe te chuan Russia an hrekna lamah a hnen atangin crude oil an lei duh miah lo thung a. Chutak chu remchangah hmangin India chuan man tlawm zawkin Russia oil te chu a chawlut hem hem thung a ni.