Oilpalm chingtuten an sum dawn tur an dawn loh vangin larsap pun

Oilpalm chingtuten an sum dawn
tur an dawn loh vangin larsap pun
Mamit leh Kolasib district-a oilpalm chingtute chuan Ningani khan larsap Dr Hari Babu Kambhampati an hmu a. Sawrkar laipuiin tanpuina a pe tur tun thlenga a pek loh avangin hma lakpui turin an ngen.
District pahniha oil palm chingtute sawi danin, sawrkar laipuiin ram chhunga oilpalm chingtute a enkawlna scheme, National Mission on Edible Oil -Oilpalm (NMEO-OP) a hman chu 2022 November atang khan Mizorama oilpalm chingtute pawh he scheme hnuaiah hian telh ni mah se, chu hamthatna chu an la dawng lo.
Kolasib leh Mamit district-a oilpalm chingtute hi Agriculture department hnuaiah Godrej Agrovet Ltd company-in enkawlin, farmer-te oilpalm thar chu kum 18 vel chhung an leisak tawh a, Bukvanneia oilpalm mill-ah herin kumtin oilpalm hriak metric tonne tam tak state pawnah an thawnchhuak tawh.
Oilpalm rah an hralhna hi Godrej Agrovet chuan farmer-te bank account-ah thlakhat chhungin vawi hnih a pe thin a; farmer-ten oilpalm ah hralh zat ang zelin NMEO-OP scheme atang hian sawrkar laipui chuan viability gap funding (kg khatah Rs.2 vel) farmer-te bank account-ah a pe tur a nih laiin, 2022 November atanga tun thlengin pek an la ni lo. Sum an dawn tur an la dawn loh hi a vaiin nuai 330 vel a tling tih an sawi.
He an harsatna sutkian pui tur hian larsap hi an ngen a. NMEO-OP scheme atanga farmer-ten kawng tha an neihna tur leh scheme kaltlanga hmalakna tur hrang hrang an sawipui bawk.
Tunah hian Mamit leh Kolasib district-ah oilpalm rah hralh mek chhungkaw 600 chuang awmin, Godrej Agrovet Ltd-in kg ah Rs. 10-15 in a lei sak a, oilpalm hralhna rate a san tak avang hian thlatin cheng nuai chunglam lalut pawh chhungkaw 20 vel awm tawhin, thlatin cheng sing nga chunglam la lut chhungkaw 40 vel an awm.