Old pension scheme ngiatin pungkhawm

Mizoram sawrkar hnuaia thawk, pension dan thar hmangtu – Mizoram Movement for Old Pension Scheme (MIMOPS) chuan Nilaini khan Old Pension Scheme hman phutin Chief Minister Office luhna gate bulah an pungkhawm a, vawiin – Ningani chawhnu dar 1.00 thleng sawrkar thuchhuak an ngaichang dawn.
MIMOPS president Lalrinmawia Sailo chuan, pension dan thar New Pension Scheme chu sawrkar laipuiin kum 2014-a a hman hnuah a that leh that loh hrechiang hmasa phawt loin, Mizoram sawrkarin a hmang ve ringawt niin a sawi a. Sawrkar laipui leh ramchhung state tam takin tha an tih loh avangin dan hluiah an inlet leh mek nia sawiin, dan hlui hmang leh tur hian sawrkar tan sum tam tak sen belh a ngaih loh thu a sawi.
MIMOPS hruaitute chuan chief minister chu an thil phut chungchang sawipuiin, chief minister hian sawrkarin an dinhmun a hriatthiampui thu te, New Pension Scheme thlakna tur dan thar siamtu tur Study Team din an remtih thute a lo hrilh a. Study Team-ah hian an pawl aiawh an tel tur thu leh study team chuan thla ruk chhungin an report sawrkarah an theh luh tur thu a sawi a. Pension rules hmasaa a tha laite la in, thlatin pension lawmman lak theihna dan siam tum a nih thu a lo hrilh tih an sawi.
New Pension Scheme chungchanga sawrkarin hriattirna a chhuah tur chu October 4 hian tihchhuah nghal beiseiin an pawl memberten nghak mah se, sawrkar hotuten an chhuah hman dawn loh thu an hrilh avangin October 5 chawhnu dar 1.00 thleng sawrkar thuchhuak ngaihchan an remti a. Hemi chhunga hriattirna a chhuak lo emaw an duh anga hriattirna chhuah a ni lo emaw a nih chuan an kal zel dan tur an ngaihtuah dawn tih pawl hruaitute hian an sawi a ni.