Olympic atangin Swiatek tla fel

Paris Olympic Games tennis hmeichhe singles lamah world number one Iga Swiatek chuan Ningani khan Olympic semi-final paltlang zo loin Chinese Zheng Qinwen lakah Roland Garros bika match 25 a chakzawnna a hloh a, kum 2021 hnu lama he khelmuala a tlawm vawikhatna niin, a zawna French Open title vawithumna a lak kumah clay-court grand slam khelhna mualah final a lut zo ta lo a ni.
Kum 23 mi Swiatek hian tunhma lama Zheng vawiruk a hmachhawn tawhah chak vekin, kumin Olympic-ah pawh Chinese laka hnehna chang leh ngei tura ngaih a nih laiin claycourt specialist hian season kal laia a khelhchhiat ber hun a tawngbua a, unforced error ngawt pawh tum 36 ngawt a nei a, a tumpui khan 15 lek a nei thung.
Grand Slam title panga la tling tawh Pole hian inkhelh bana amah kawm tum international reporter-te zawhna a chhang duh lo a, “Sorry, next time,” tiin a chhang.
Swiatek hian medal beiseina a la nei tho a, semi-final danga Croatian Donna Vekic laka tlawm Slovak Anna Karolina Schmiedlova nen bronze medal an inchuh ang.
Kum 21 mi Zheng hi kumin Australian Open final-ah khan a tlawm a, tunah hian a career-a title lian ber tur a thlir leh mek a, Inrinni gold-medal inchuh match-ah Donna Vekic a tum leh dawn a ni.