Olympic discipline infiamnaah ram aiawh pha chher kan tum – Chief minister

Olympic discipline infiamnaah
ram aiawh pha chher kan tum
– Chief minister
2036 Olympic-ah Mizo naupang, Olympic-a tel infiamnaah India ram aiawh theia chher tumin Vision 2036 chu Mizoram sawrkarin a kalpui mek tih chief minister Lalduhoma chuan a sawi.
Minister B Lalchhanzova’n a nu leh pa – B Lalthuamliana leh Rohnuni te hriatrengna football tournament, Thenzawl Zone Football Association-in Lothazawl playground-a a buatsaih chu Inrinni khan khar a ni a. Serchhip bialtu MLA ni bawk Lalduhoma bakah minister Lalrinpuii leh tournament bul tumtu minister B Lalchhanzova ten an telpui.
Chief Minister chuan India ram chu kum 2036-ah Olympic thlen tumin a inbuatsaih mek a, chutah chuan Mizo thalaite India aiawha an tel ve ngei theihnan Vision 2036 an kalpui ve thung tih a sawi. Sports minister Pu Lalnghinglova Hmar hoin Olympic discipline-a kan lo inpuahchah ve theihna kawngah kan inpuahchah nasa dawn tih sawiin, “Kan tum ber chu kan naupang, talent neite zawnchhuah a, training pek a, India aiawh thei tura chher a ni,” a ti.
Football chu khawvel ngaihhlut infiamna a nih avangin a thiamte tan eizawnna remchang a tam a, foreign leh India ram chhungah hausak pui na tham hmun tha a tam hle tih chief minister hian a sawi. “Tunah pawh Mizo tlangval, Indian Super League-a khel kan nei fur a, Mizo tlangval hlawh tha zualte hian kar khatah cheng nuai hnih vel an hlawh thei. An kar khat hlawh hi Mizoram senior grade officer-te thla khat hlawh aiin a tam zawk a ni. ISL khel pha chiah lo tan pawhin I-League kan la nei lehzel a. Tih tak takna nena bei tan chuan dinchuahna kawng a awm a ni. Mahnia zuk ngaihven vak pawh a ngai lo, club lam hian an rawn ngaihven tawh zawk,” a ti.
Vawiina footballer langsar ber berte chu retheihna leh harsatna tam tak paltlangtute an ni a, kawngpui dunga inkhelh bul tan a, atchilh zui ta an ni deuh ber tih a sawi. “Pianpui talent nei an awm a, a hranpaa inzir chhuak an awm bawk. Talent hi tihpun ngai, zir zui ngai tho a ni,” Lalduhoma hian a ti a. He infiamna huanga hlawhtling turin footballer-ten chance an nei vek tihna a ni tih a sawi a ni.
Thenzawlah MLA fund leh fund dang hmangin indoor volleyball stadium din an tum a, community hall pawh theih angin an ngaihtuah zui dawn a, football house an dil pawh a kawng an zawng dawn tih a sawi bawk.
December 3 atang khan tournament hi an tan a, team 13 telin, an zinga team thum chu Thenzawl atanga tel an ni.