Olympic football – Argentina an chak lo

July 24, nilaini khan Paris Olympic 2024 football inelna neih tan a ni a, champion tura rinkai zinga mi Argentina chu Morocco hneh lovin an tlawm nghal. Argentina an chak loh lai hian rinkai zinga mi France leh Spain ten hnehna an chang thung.
Inkhel danglam tak chu
Argentina leh Morocco te hi Stade Geoffroy-Guichard, Saint-Etienne, France-ah an inkhel a, an inkhel hi a hmunah mi 26,717 zetin an en nghe nghe. Inkhel hmuhnawm tak hi Morocco tantute mualchhunga an tlan luh bakah hmanraw hrang hrang an vawm luh bawk vangin a khaihlak rei hle. He inkhel a danglamna em em chu 2-2 a inhnehtawk anga an tin hnu darkar khat leh a chanve hnu zetah VAR rawn that leh a ni kha a ni a. VAR an rawn that leh hnuhnawh vangin Argentina goal hnawl a ni a, Morocco in point thum an hmuh theih phah.
Inkhel hmuhnawm takah hian goal lut a awm lawk thei lova, team hnihte an indang chat tawn nasa hle. Goal lut a awm theih loh reng hnuin chawlhlawk dawn hnaih minute 45+2-ah Soufiane Rahimi chuan Morocco hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, 1-0 a hmahruai mek Morocco in goal an thun hmasa leh. Minute 51-na lekah Argentina an chesual a, penalty an chawi. He penalty hi goal hmahruai thuntu Soufiane Rahimi chuan awlsam takin a pet goal a, an hmahruaina a tizau.
Si hnih ngawta an hnufual hnuin Argentina in an si phurh sut ngei tumin tan an khawh a, inkhel hmuhnawm zawk an lantir. Argentina tan hian Giuliano Simeone chuan minute 68-naah goal thunin an si phurh a sut then. Goal an thun hnuin Argentina an khel tha chhunzawm a, goal an thun teuh thei hle. World Cup 2022 a chetha tak Julian Alvarez chuan goal thun theihna hun tha zet mai a nei a, si nghak chiah a hmachhawn tawh chungin goal a thun zo lo tlat thung. Buaina neuh neuh a chhuah hnuin hun pek belh tawp dawn tepah Cristian Medina chuan goal thunin an si phurh a sut ta nge nge. Hemi hnu hian Morocco tantute lamain buaina nasa tak an siam nawn leh vangin inkhel tihtawp lai lawk a ni a, 2-2 a inhnehtawkin an tin phawt.
Buaina vangin inkhel an chawlhsan rei viau. 2-2 a inhnehtawka ngaih an nih reng laiin player ten mualchhung an lut nawn leh. Medina goal thun chu VAR hmangin ennawn leh a ni. Medina goal thun hi pawm a nih chuan inkhel chhunzawm lovin inkhel a tawp zui nghal thei dawn. Uluk taka VAR rawn a nih hnuin Medina goal hi offside vangin hnawl a ni a, entu mipui awm lovin minute thum khelh belh leh a ni. Minute thum chhungin Argentina hian goal an thun thei tawh lova, Morocco lakah an tlawm zui ta a ni. Argentina chuan he inkhela thil thleng chungchangah hian FIFA hnenah complain an thehlut.
Chak zo lova ngaih tawh Morocco in Argentina lakah hnehna an chang hi thil mak leh chhinchhiahtlak a ni ngei thung ang.
Argentina leh Morocco te hi Group B-ah an awm a, Group B a inkhel dangah Iraq chuan an khingpui Ukraine chu 2-1 a hnehin point thum an hmu ve bawk.
France an chak awlsam
Argentina an chak loh lai hian Argentina haw thar em emtu France chuan USA an hmachhawn a, USA lakah awlsam takin an chak ve thung.
France hian USA lakah inkhel thununin hlauhawm zawkah tan reng mah se darkar khat chhung ngawt goal an thun thei bik lo. Hun rei tak goal lut a awm theih loh hnuin Arsenal forward hlui Alexandre Lacazette chuan minute 61-naah hmahruaina goal a thun. Lacazette goal thun hian France a fuih phur a, goal hnih ngawt an thun belh. EPL lama hming chher thar tak Michael Olise chuan minute 69-naah France goal hnihna a thun a, Loïc Badé chuan minute 85-naah an goal thumna a thun zui leh bawk.
France hian Group A-ah point thum hmuin hma an hruai. Group B atanga inkhel dangah New Zealand chuan an khingpui Guinea chu 2-1 a hnehin point thum an hmu ve bawk.
Spain pawh an chak
World Champion Argentina tlawm a, France chak rualin Euro 2024 champion Spain in hnehna nen bul an tan ve thung. Spain hian Parc des Princes, Paris-ah Uzbekistan an hmachhawn a, an goal khatna an humhim zawh loh zet hnuin hnehna an chang let. Spain tan hian Marc Pubill chuan minute 28-naah hmahruaina goal a thun. Team lian Spain lakah si an phurh reng hnuin Uzbekistan tan Eldor Shomurodov chuan minute 45+3-ah penalty atangin goal a thun a, an si phurh sutin, 1-1 a inhnehtawk chungin chawlhlawk an hmang.
Chawlhlawk hnu lamah Spain an khel tha lehzual a, goal pawh an thun thuai. Minute 62-naah Sergio Gómez chuan hma an hruai nawn lehna goal a thun a, he goal hmang hian point thum an hmu zui ta a ni.
Spain hi Group C-ah Egypt leh Dominican Republic te nen an awm tlang a, round khatnaah point thum hmu awmchhun an ni.
Result dang
Olympic football khelh tan niaah Japan chuan an khingpui Paraguay chu 5-0 ngawtin an sawp a, Japan tan hian Shunsuke Mito leh Shota Fujio ten goal khat ve ve an thun a, Rihito Yamamoto chuan goal khat a thun bawk. Inkhel dangah Mali leh Israel te chu 1-1 in an inhnehtawk ve bawk.
Under 23 team aw
Olympic football a inelte hi Under 23 team an ni tih hriat reng tur a ni a. Under 23 team ni bawk mah se squad tinah hian kum 23 chin chung lam player pathum chin tel phalsak an ni tih pawh kan hriat tel a tha awm e!