Olympics 2024: Chinese badminton player-in gold medal a dawn zawhah a ngaihzawng nen an inhual

Team China badminton player Huang Yaqiong chuan 2024 Paris Olympics-ah a mixed doubles partner Zheng Siwei nen gold medal an dawng a, medal inhlanna ceremony an neih zawh chiahah a teammate Liu Yuchen chu a hmaah a thingthi deuh hnâp a, zungbun bawm phawrhin, a nupui ni turin a sawm ta a ni. A gold medal dawn nen a lawmna a thuahhnih dawn mang e.
Huang chuan, “Ka awmdan hi sawi ngaihna pawh ka hre lo, ka hlim em em a ni tawp mai. Gold medal dawn hi kan zinkawnga hlawhtlinna a ni a,” a ti a, “Inhualna zungbun khan min barakhaih chiang hle. Olympic champion nih tumin ka insawrbing a, kha kha chu beisei ngaihna pawh ka hre lo,” a ti a, an inhualna chu engtin nge an lawm dawn tih pawh a la hriatthiam loh thu a sawi bawk.
Huang leh Zeng te hi 2020 Tokyo Olympics-ah khan badminton mixed doubles-ah an lo tang dun tawh bawk a, chumi tum pawh chuan silver medal an dawng a, hemi hnuah Zheng hian nupui hual a nei zui ve nghal bawk.
Kumin Olympics Games-ah hian inhual a lar riau a ni ang, Argentina mipa handball player Pablo Simonet pawh a tawih, Argentina hmeichhe hockey team ami Maria Campoy nen Olympic Village-ah an inhual ve tawh bawk.