2024 Paris Olympics opening ceremony-ah khan Kristian-te tin khei deuh zaktu thil pakhat a awm a, DJ Barbara Butch chu drag queen (mipa hmeichhe thawmhnaw inbel a, hmeichhia anga khawsa) rual nen an perform a, an zingah hian Drag Race France host Nicky Doll pawh a tel a, an tableau siamah chuan dawhkan lian leh sei tak pakhat hnungah an thu tlar a, he dawhkan an kil dan hi Kristiante ngaihhlut tak, Leonardo da Vinci painting khawvelin a hriatlar, Zanriah Hnuhnung (The Last Supper) an tihelna leh Kristian sakhaw deusawhna nia ngaih theihin a awm a, hei Kristian pawl tam takin an sawisel nasa hle a ni.
French Catholic Church hnuaia bishop inzawmkhawm pawl pawhin he performance hi na taka sawiselin, Kristianna deusawhna a ni, an ti a, he scene-in zahpuiawm takin khawmualpui hrang hrang a Kristian rilru a tihnat zawng zawng te nen hruikhat an vawn thu an puang.
Hetianga sawiselna a nasat tak hnuah ian Olympic Games X (Twitter an tih thin kha) official account-ah a sawifiahna an tichhuak ta a, he performance atanga thlalak thenkhat te pawh an post tel a, Kristianna deusawhna a nih loh thu leh, he performance hi Greek wine pathian Dionysus-a ruai theh entirna a nih zawk thu an puang a, “Greek pathian Dionysus entir a ni hian mihringte inkara tharum thawhna lo thleng thin duh lohna a entir zawk a ni,” an ti.
Olympics thupuangtu Anne Descamps pawhin he performance sawiselna chungchanga press conference a neihah zawhna chhangin International Olympic Committee (IOC) emaw he show artistic director Tomas Jolly emaw te chuan ang sakhua bik emaw deusawhna turin show hi an buatsaih loh thu a sawi ve bawk.
Olympics-in opening ceremony a drag performance chu Kristian sakhaw deusawhna a nih loh thu an puang
Get real time updates directly on you device, subscribe now.
Prev Post