Oppon. leh BJP te inbeihna nasa zual

Manipur-a buaina nasa zel kaihhnawihah Opposition party leh BJP te chuan tawngkaa inbeihna ti nasa zual zelin a bik takin BJP tena Congress rorelna Rajasthan leh Trinamool Congress rorelna West Bengal-ah te hmeichhiate laka hleilenna thleng tiin chunga Opposition te ngawih chuhah zawhna an neih thu an sawi a.
Hei hi chhang letin Oppositon leader te chuan BJP te chu ‘diversionary tactics’ hmanga Parliament a Manipur chungchang sawihona neih pumpelh tum an ti ve thung.
Congress general secretary Jairam Ramesh chua, “Prime Minister leh a thuihruaite hian tun hnai ni 80 chhunga Manipur-a tawrhna nasa tak thleng tawh te chu lak pen tuma chet lain Rajasthan kaihhnawih thilah dawt muhlum an phuahchawp a ni,” tiin a sawi a.
TMC leader Derek O’Brien chuan BJP te chu Parliament tibuai luiah puhin, “Thawhtanni zing atangin Manipur chungchang sawihona neih ni rawh se. PM hian eng hmunah nge sawihona bultan a duh thlang se – Lok Sabha nge Rajysa Sabha, a duhthlanna ni se, chungah te chuan kan tel mai ang,” tiin O’Brien chuan a sawi.
Opposition te chuan Thawhtanni atan strategy an neih thu sawiin Prime Minister-in thuchhuah a neih ngei theih nan Mahatma Gandhi lim hma Parliament-ah punkhawm an tum thu an sawi.
Hetih lai hian BJP te chuan Malda, West Bengal-a tribal hmeichia pahnihte thawmhnaw phelhsaka vuak te video chu an thehdarh ve thung a.
West Bengal Chief Minister Mamata Banerjee chu sawiselin Union Education Minister Dharmendra Pradhan chuan, “Manipur thil thleng hi a vanduaithlak a, mahse, West Bengal a thil thleng hi a la vanduaithlak lehzual. Manipur a thil thleng laka thinrim em em te awmna West Bengal ah Manipur a thil thleng ang tho a thleng a ni,” tiin a sawi.
Union Mnister Anurag Thakur chuan Congress president Sonia Gandhi leh Rahul Gandhi bakah Oppositon leader tena ngawih an chuhah zawhna a neih thu a sawi bawk a. “Tun hnai kum li chhungin Rajasthan-ah hmeichhiate laka tharum thawhna case nuai khat chuang a awm a. Chutah pawh mipat hmeichhiatna kaihhnawih case 33,000 lai a awm a ni,” tiin Thakur chuan press conference a neihnaah a sawi a.
Thakur bakah hian Union Minister for Women and Child Development Smriti Irani te chuan Rajasthan sorkar minister-in an state-a hmeichhiate laka hleilenna chungchang a sawi an ti bawk a. “Lungaiwloh thlak deuh chu Rajasthan State minister in an state a hmeichhiate laka hleilenna a sawi lang a. Chuti chung chuan Congress te chuan an phatpui thung,” tiin Irani chuan a sawi bawk.
Jaipur-a press conference a neihnaah Chief Minister Ashok Gehlot chuan VHP rorelna state Madhya Pradesh-ah hmeichiate laka hleilenna record a sang ber a ti a. Rajasthana case san ber chhan chu a sorkarin chinfel tuma tihmakmawh tia hma a lak vang a ni tiin a sawi.
Rajya Sabha member leh Congress leader Ranjeet Ranjan chuan Irani chu Rajasthan leh Chhattisgarh chu sawi duh bikah a nei a ti a, BJP rorelna Uttar Pradesh leh Haryana bakah Delhi, Union Home Ministry in a thununna police te chu hmaihlui a ti thung a.
“WCD minsiter Smirit Irani hian Manipur buainaah mawhphurhna lak a tum lo. He sorkar hian Opposition a hlauh avangin misual ang maiin chet an la zawk a ni,” tiin Ranjan chuan a sawi.
Gehlot an sawisel
Rajasthan Chief Minister Ahok Gehlot chuan PM Modi chu Manipur thil thleng sawi nana Rajasthan a kailut tel kher chuan ‘mipuite a ti na’ tiin a sawi a. Gehlot chuan eng vangin nge tun thlengin Modi hian Manipur a la tlawh loh? tiin zawhna a siam bawk.
Gehlot chuan election cmapaign a state tinreng tlawha foreign ram thlenga zin kual reng thei hian Manipur tlawhna hun a nei lo a nia. “Manipur hi kan ram bung a ni a. BJP sorkar nei mek a ni” tiin Gehlot chuan a sawi bawk a.
“Manipur hi Congress rorelna ni se chuan engtin tak Modi an sawi nei ang maw” tiin Gehlot chuan a sawi bawk a. Manipur CM berin pawngsual 100 chuang a thleng a, FIR pawh 1,000 chuang a lut tawh tiin a sawi a ni, a ti bawk.