Prime Minister Narendra Modi chu June 23-a Opposition party tena Patna-a meeting an neih hnuah ‘nuam tiin a awm lo’ tiin Nationalist Congress Party (NCP) president Sharad Pawar chuan a sawi a. Bengaluru-ah July 13 leh 14-ah meeting neih leh a nih tur thu a sawi bawk.
“Patna meeting-a hruaitu lawk 16 kan inhmukhawm khan PM Modi awm a tinuam lo hle a ni. Patna kan inhmuhkhawm lai khan America ah a awm a. A lo let lehah kan meeting hre zuiin a nuam tihlohna nasa zualin mimal takin min bei zui ta zel a ni. Kan meeting te pawh ‘photogenic session’ tiin a sawi a nih kha. Bengaluru-ah July 13 leh 14 ah meeting kan nei leh ang,” tiin Pawar chuan a sawi.
A hmaa Shimla-a meeting neih an tum zawk chu hill station-ah ruah a sur nasat em avanga thulh an nih thu a sawi bawk a.
“Bengaluru zawka meeting neih hi vawiinah thutlukna kan siam a. Nakin zela electoral strategy kan neih turte ruling party BJP tena an thuneihna an hmansual leh State tam taka communal boruak an siam chungchangte kan sawiho ang,” tiin Pawar chuan a sawi.
-- Advertisement --
UCC chungchang
Uniform Civil Code (UCC) kalpui a nih hma hian Union government chuan Lok Sabha leh leh Legislative Assembly tinah hmeichhiate tana seat reservation a kalpui hmasa tur a ni a ti a. NCP te chuan community hrang hrangte biak rawn an nih hnuah UCC-a an tanna sawi lan a ni ang, a ti bawk a.
Manipur buaina chungchangah PM chu sawisel bawkin Pawar chuan, “Ni 45 chuang Manipur buaina nasa takin a bawhbuai tawh hnuah mipuite leh officer-te chuan he ram khua leh tui an nih leh nih lohah zawhna an nei a ni. Modi sorkar hian buaina thunun kawngah an hlawhchham thak bawk,” tiin a sawi bawk.
Pawar chuan Modi-an Bhopal-a amah leh a fanu NCP MP Supriya Sule te chungchang a sawi chu sawisel bawkin, “Vawiin hian State tam zawkah BJP ten thuneihna an nei tawh lo. A chhan ber pawh kum 2024 inthlan turah engmah chiang a awm thei lo va, PM hian a dinhmun pawh ngaihtuah lovin kei leh ka party leh ka fanute min bei vak vak mai a ni. Sule hian ama theihna liau liauin parliament-ah tum thum thlan tlin a ni tawh a. Lok Sabha-ah pawh hmatawng berah tangin award tum sarih a dawng tawh bawk a. PM-in nepotism tia a sawi hian awmzia a nei lo,” tiin Pawar chuan a sawi bawk a.
Mahse, amah leh PM Modi inkarah mimala inhuatna engmah an neih loh thu sawiin tun hnai lawkah pawh August 1-a Pune a inhmuhkhawmna neih tur kaihhnawihah PM Modi chu a biak thu a sawi bawk.
Tun hnaia Bhopal a tlawhnaah PM Modi chuan Pawar chu Maharashtra Cooperative Bank scam, Maharashtra irrigation scam leh illegal mining scam Rs 70,000 crore hu vel zetah inhnamhnawih tiin a sawi a ni.
Kum 2019 dram sawilanna
Maharashtra Deputy Chief Minister Devendra Fadnavis-an kum 2019 khan Pawar chuan ‘double game’ khelin NCP leader Ajit Pawar chu sorkar siamtir tumin Pawar chuan Fadnavis, khatih laia Home Minister chu Maharashtra-a hmeichhiate himna ngaihtuah tura tiin a bei hrep tia a sawi chu a hnial a.
“State-a district 14 bikah January 23 leh May 23 inkar khan hmeichhe naupang 4,431 an bo a ni. State Home Minister hian thil dang sawi lovin kan fanute himna hi ngaihtuah rawh se,” tiin NCP chief chuan a sawi a.
Fadnavis thung chuan kum 2019 Assembly election hnua sorkar siam tumna chu Pawar hriatpuiaa tih vek ni mah se, a dawn ruaiah NCP chief chuan a dinna a thlak a ni, tiin a sawi a.
Pawar chuan he mi chungchang hi sawiin, “A dawn ruaiah inlamlet leh thut pawh ni ila, Fadnavis hian a rukin Ajit Pawar nen kum 2019-a rinawmna thu an tiam khan BJP te chu thuneihna tel lovin an dam khawchhuak thei lo tih a pholang a ni. BJP te an mumal thei lo va, zing karah Ajit Pawar hovin a rukin rinawmna thutiamin chet an la a, BJP te hian thuneihna an channa a nih chuan tute pawh an thawhpui thei vek. Cricket khel ngai lo mah ila, googly dan ka hria a, a chhan chu Chairman of the Board of Control for Cricket-in India (BCCI) leh ICC president ka ni tlat tawh,” tiin a sawi bawk.